Vil ha eiga stortingsmelding om vindkraft

NPK-NTB: Det kraftige engasjementet rundt utbygging av vindkraft på land bør føre til at regjeringa kjem med ei stortingsmelding om temaet, meiner Turistforeininga.
Noregs vassdrags- og energidirektorat (NVE) peika i april ut 13 område som direktoratet meiner er dei mest eigna for vindkraft på land i Noreg. 98 kommunar har areal innanfor dei 13 områda.

Rekordmange svar

Over 5.000 svar kom inn i høyringsrunden, som vart avslutta 1. oktober.
– Regjeringa må ta signala på alvor. Det held ikkje å flikke på dagens system. Dei er nøydde til å legge opp til ei grundigare oppfølging enn planlagt. Derfor bør det lagast ei stortingsmelding, seier styreleiar Per Hanasand i Den Norske Turistforening (DNT).

- Tar for lite omsyn til natur

Han meiner det er behov for ein gjennomtenkt nasjonal politikk som avveg omsyna mellom utbygging av energi og ivaretaking av natur. Det held ikkje berre å skrote NVEs kart – regjeringa må òg ta tak i korleis vindkraftutbygginga på land blir planlagd og blir styrt, er bodskapen frå DNT.
– Regjeringa har førebels ikkje signalisert at dei vil gjere noko med det som har vore hovudkritikken i høyringa: At dagens system tar altfor lite omsyn til natur, seier Hanasand.
Han krev at stortingsmeldinga set rammer for korleis eventuell vidare vindkraftutbygging i Noreg kan føregå utan alvorlege naturinngrep.