Vekst for Sykkylven selskap
SYKKYLVEN: Sandella Fabrikken har hovudkontoret i Sykkylven. Dei leverer formstøpte puter og sitjesystem, i all hovedsak skreddersydde produkt på ordrar. Eksportandelen var i fjor 62 prosent.  
Nytt

Vekst for Sykkylven-selskap

Sandella Fabrikken lukkast med å auke omsetninga både på heime- og eksportmarknaden i fjor. 

Kristin Vidhammer
12.07.2018
Sandella, med hovudkontor i Sykkylven, er den største uavhengige produsenten av formstøypt kaldskum i Europa. Dei leverer formstøpte puter og sitjesystem til heimar, kontor, kasino, tog, buss, skip og passasjerbåtar verda over. Dei leverer også til komponenter til rullestolar og til barnestolar og nakkeputer til Volvo mellom anna.
I fjor fekk Sandella Fabrikken as samla driftsinntekter på 91 millioner kroner og eit resultat før skatt på i overkant av 500.000 kroner (sjå tabell). Det er høgare omsetning, men eit svakare resultat enn året før.
Styret skriv i årsmeldinga at dei ser positivt på framtidig utvikling for konsernet og at dei arbeider med effektivisering.
- Arbeidet med ytterlege rasjonaliseringstiltak og effektivisering vil bli vidareført i 2018 og nødvendige tiltak og tilpasningar vil bli fortløpande vurdert, skriv dei vidare.
Dei arbeider kontinuerlig med å forbetre og utvikle ny teknologi, der utgiftene til dette blir kostnadsført løpande.

Norden og USA

Hovudmarknadane er Norden, USA og England. Eksportandelen er stigande og var i fjor 62 prosent. I fjor auka omsetninga både på heime- og eksportmarknaden.
Den største eksportauken hadde dei i USA.
- Vi leverer til rundt 15 land, men det er USA som har blitt den viktigaste eksportmarknaden for oss. Faktisk er den største enkeltkunden i Sandella no eit selskap i Reno, Nevada, og som leverer stolar til kasino meir eller mindre verda over, sa administrerande direktør Ingemar Eliassen og marknadsdirektør Hroar Pedersen til NETT NO i 2016.
Dei anslo at dei då ville levere rundt 50.000 formstøypte puter til denne kunden.
Les også:

Mange bein å stå på

Sjølv om selskapet leverer til meir eller mindre alle møbelprodusentane lokalt, har den norske marknaden blitt mindre som følgje av at det har blitt færre produsentar og mange også har også flytta ut.
- Vi er heilt avhengig av eksportmarknaden. Vi er blitt godt diversifisert og har mange bein å stå på. Sjølv om det går noko svakare når det gjeld møbel til heimemarknaden i Norge og Europa, veks vi på andre område. Vi har mellom anna fått ein del ordrar no på ein del nye, større prosjekt. Det er positivt og tyder på eit visst volum framover i tid, sa dei vidare i 2016.

Gjort fleire oppkjøp gjennom åra

Selskapet har vore offensive og har dei seinare åra gjort ein del oppkjøp for å tilegne seg meir kompetanse innan konstruksjonar/materialer og 3D – men også for å kjøpe opp konkurrerande verksemd.
Sandella valde for nokre år sidan – i 2008 og 2012/13 – å kjøpe opp formstøypingsavdelingane til dei to norske konkurrentane Porolon og Westnofa. Dermed er dei no det einaste norske selskapet som driv med formstøyping i sin marknad.
Dei seinare åra har dei også kjøpt opp ein fabrikk i Sverige og ein i Litauen. Konsernet hadde ei omsetning på rundt 145 millioner kroner i 2016.
I fjor var det 75 tilsette i Sandella Fabrikken as, i tillegg kjem tilsette i Sverige og Litauen. Sandella har heilt sidan etableringa i 1960 vore eigd av familien Mehren i Oslo gjennom deira selskap Mehren Holding.

Publisert: 12.07.2018 15:49

Sist oppdatert: 10.02.2021 14:24