163 millionar kroner i underskot før skatt gjorde at verftskonsernet Vard enda med 1,2 milliardar kroner i minus i 2015 viser kvartalsrapporten for 4. kvartal.
Selskapet legg fram ny strategi, som skal gjere skipsbyggingskonsernet mindre avhengig av oljebransjen.

Utviklinga har vore negativ for Vard gjennom 2014. Stikkorda er fallande marknad for offshorefarty, ikkje rask nok tilpassing til lågare inntekter i Europa, men først og fremst langt større vanskar med å få lønsemd på Vard sine to brasilianske verft.

Tettare samarbeid

Kvartals- og årsrapporten, som blei sendt ut før børsen i Singapore opna mandag 29. februar, listar opp ei rekkje tiltak Vard har sett i verk for å få kostnadane ned og inntektene opp:
Konsernet skal samarbeid tettare med skipsbyggingsverksemda til hovudeigarene, det italienske verftskonsernet Fincantieri. Skrogverfta Vard Tulcea og Vard Braila skal også kunne byggje enklare farty, og Tulcea skal bli leverandør av seksjonar til cruisefarty som skal byggjast hos Fincantieri.
Vard har revurdert satsinga på skipsbygging i Brasil, etter tunge tap. Konklusjonen er at skipsbygginga i Brasil skal halde fram, men tilpassast den lokale etterspørselen. Når Vard Niteroí er ferdig med dagens kontakter, skal verftet ikkje lenger bygge skip. Skipsbygginga skal foregå hos Vard Promar, det nyaste verftet.

Spesialisering i Noreg

Vard vil også spesialisere verfta i Noreg.
Søviknes og Brattvåg i Haram og Langsten i Tomrefjord skal konsentere seg om kjerneverksemda, offshorfarty og andre høgst spesialiserte farty innan nye satsingområde.

Vard Aukra skal spesialisere seg på farty til oppdrettsnæringa, medan Vard Brevik også skal satse på å "utvikle nye forretningsmoglegheiter", i følgje reknskapsrapporten.

Skal byggje cruise-skip

Fincantieri er allereie ein stor aktør i cruisemarknaden. No skal dotterselskapet Vard inn i den same marknaden, men vil spesialisere seg på cruisefarty i den dyraste delen av marknaden, med skip som kombinerer eigenskapane til offshorefarty, forskingsskip og cruisefarty og blant anna kan operere i artiske strøk.
Vard vil også inn i forsvarsmarknaden, der Fincantieri allereie er inne.

Vind og Midt-austen

Serviceskip vindkraftanlegg til havs blir og eit satsingområde for Vard.
Og medan verftskonsernet ikkje ser for seg ein snarleg opptur i bygging av offshorefarty for norsk sokkel og ellers i verda, er Midt-Austen eitt unntak der Vard reknar med relativt god etterspørsel etter offshorefarty for oljeutvinning framover.

Botnen nådd i 2016

I år spår Vard eit fall i driftsinntektene til 8-9 milliardar kroner. 2016 blir eit botnår, trur Vard. Framover til 2020 vil driftsinntekten gradvis auke opp til 12-13 milliardar kroner i året. Det er same nivå som i 2014, då konsernet gjekk med overskot (sjå tabell).