Utvidar automasjons-utdanning

- Dei siste åra har alle som vil fått læreplass, seier faglærar Odd Krüger om elevane som utdanner seg i automasjon ved Sykkylven vidaregåande skule. Når dei er ferdig med utdanninga går dei inn i jobbar som mellom innber robootprogrammering.
Det er to grunnar til at det går bra; etterspørselen aukar og elevane har blitt flinkare.
- Dei er fagleg sterkare og det har mykje med utstyrsdelene å gjere. Vi har klart å gi dei utfordringar av den typen dei får i verklegheita, seier Krüger.
No er robotparken på skulen auka frå to til fem. Fleire robotar aukar kapasiteten i undervisninga. Før var det mykje venting for å sleppe til.

- Vi får fleire timar, seier automasjonselev Håvard Tynes.

Byttehandel med Ekornes

Sykkylven Vidaregåande skule og Ekornes-konsernet - ei av dei mest robotiserte bedriftene i Noreg - har hatt ein byttehandel gåande i fleire år. Skulen får topp moderne robotar frå Ekornes, og skulen gir Ekornestilsette kurs tilbake.
Fredag markerte skulen at den har fått to nye robotar frå Ekornes, i tillegg til den eine frå Ekornes som sto der frå før. I tillegg har skulen sjølv kjøpt inn ein ny robot slik at elevane no har fem robotar å øve seg på.
Skulen er i ei særstilling takke vere samarbeidet med næringslivet og ein rektor med vilje til å prioritere utstyr, meiner faglærar Krüger.
- Dette er ikkje standard. Mange har ein robot og mange har ingen, seier han.

Utvidar tilbodet

Til hausten auka skulen opptaket av elevar til automasjonsutdanning frå sju til 12.
I skuleåret 2020/2021 er målet å tilby ei ny utdanning, i robotikk. Det er ei treårig utdanning, som gir generell studiekompetanse, men som er spesielt retta mot folk som vil studere vidare, mellom anna for å bli dataprogrammerarar.
Den nye utdanning kan og kombinerast med eit ekstra læreår, slik at elevane får fagbrev.