Ulstein kuttar tilsette

- Marknaden er tøff og vi har sett i gang ein prosess for å sjå korleis vi kan betre lønsemda og verte meir konkurransedyktige.
Dette seier kommunikasjonssjef Lene Trude Solheim.

Forhandlingar pågår

Ho seier at ein no er i gang med forhandlingar med organisasjonane om detaljar rundt nedbemanningsprosessen.
- Vi veit ikkje det endelege resultatet, men dette gjer vi for å rigge organisasjonen for framtida.
Totalt var det ved siste årsskifte 843 tilsette i Ulstein-konsernet. Ved Ulstein Verft er det vel 400 tilsette.
- Vi blir færre tilsette når prosessen er over, seier Solheim.

62-åringar i samtale

Alle tilsette over 62 år ved Ulstein Verft har vore inne til samtale om situasjonen.
- Nokre har sagt at dei ønskjer å slutte no, andre vil fortsette i jobb,seier Solheim.

Kuttar på studentordning

Ulstein har hatt nesten 20 studentar i systemet som er under utdanning, og som selskapet har gitt årlege stipend til. Også denne delen vert det no sett på.
- Nokre av desse får tilbod om jobb i Ulstein no, nokre får støtte/stipend til vidare studiar som master på NTNU eller Høgskulen i Ålesund.
- Nokre få får ikkje vidare støtte eller tilbod om arbeid.

Ser på heile organisasjonen

Lene Trude Solheim seier at det vert sett på alle deler av organisasjonen.
- Vi ser på korleis vi kan gjere ulike deler av produksjonen billegare og meir effektiv. Alle steinar vert snudde i denne prosessen.
Ho strekar under at målet er å byggje ein organisasjon som er godt rusta for framtida.
- Vi har store ambisjonar for Ulstein og Ulstein Verft framover, men no er det viktig at vi har ei rett organisering med rett bemanning. Det er det denne prosessen handlar om.