Tommelen opp for Island og Volstad

Obligasjonseigarmøta i Island Offshore og Volstad Shipping i dag støttar refinansieringsplanane i selskapa. Framlegga til refinansiering fekk over støtte frå eigarane av over 90 prosent av låna i begge selskapa.
Både Island Offshore og Volstad Shipping la fram refinansieringsplanar i starten av mars, men var avhengig av at obligasjonseigarane sa ja for å kunne gå vidare. Det er den tøffe marknaden for offshorefarty som er årsaka til at selskapa vil refinansiere seg.

700 millionar

Som ein del av refinansieringa tilbyr Island Offshore seg og å kjøpe attende deler av obligasjonslånet på 700 millionar kroner. Obligasjonseigarane får tilbod om å selje til 72,5 prosent av pålydande, avgrensa opp til 230 milionar kroner.
Eigarane, Ulstein og Chouest-familien, har forplikta seg til å skyte inn 100 millionar i meir eigenkapital, og skip skal selgast ut av selskapet. Planen inneber og at attendebetaling av gjeld til bankar og obligasjonseigarar på 7,8 milliardar kroner blir utsett til hausten 2018.

Deler selskapet

Volstad Shipping-eigar Eivind Volstad vil mellom anna dele selskapet i to - fisk og olje - som ein del av refinansieringa. Trålaren blir skilt ut i eit eige selskap.
Planen inneber mellom anna og at selskapet kjøper attende storparten av obligasjonsgjelda. Obligasjonslånet er på 275 millionar kroner, og tilbodet er å kjøpe attende til 36 prosent av pålydande, men avgrensa opp til 220 millionar kroner. Det betyr at selskapet ved å legge 99 millionar kroner på bordet overtek gjeld som opphavleg var på 220 millionar kroner.