Storsatsing paa reiseliv mat og kultur
PÅ KICKOFF: Tom A. Skrede i Destinasjon Ålesund & Sunnmøre sit også i styringsgruppa for prosjektet "Reiseliv, mat og kultur i Møre og Romsdal 2018-2020. - Gjennom å jobbe tydelegare saman, vil gjester i regionen i større grad få betre produkt og dette vil også gjere det meir interessant for dei å kome til Møre og Romsdal, seier Skrede. 
Nytt

Storsatsing på reiseliv, mat og kultur

No blir det gjort ei storsatsing i skjeringspunktet reiseliv, mat og kultur for å løfte fram Møre og Romsdal til Norges mest attraktive og lønsame reiselivsfylke. 

Kristin Vidhammer
13.02.2018
Møre og Romsdal Fylkeskommune inviterte reiselivs-, lokalmat- og kulturnæringa til kickoff og fagsamling i Molde tirsdag.
Fylkeskommunen har tatt initiativet til ei 3-årig satsing på reiseliv, mat og kultur i fellesskap med næringsaktørar, Innovasjon Norge og Fylkesmannen i Møre og Romsdal. Idag, tirsdag, var det kickoff for hovudprosjektet, der over 170 deltok.
Tom A. Skrede, leiar for Destinasjon Ålesund & Sunnmøre, sit også i styringsgruppa for prosjektet.
- Vi gjer veldig mykje bra i regionen allereie, der reiselivet har knytt seg saman med både kultur- og mateventar. Men med det nye prosjektet, vil aktørar innan reiseliv, mat og kultur no sitje rundt det same bordet og med felles planar og ei felles reise. Gjennom å jobbe tydelegare saman, vil gjester i regionen i større grad få betre produkt i skjæringspunktet mat, kultur og reiseliv. Dette vil også gjere det meir interessant for dei å kome til Møre og Romsdal, seier Skrede.

Finansiert og initiert av Møre og Romsdal fylkeskommune

Prosjektet "Reiseliv, mat og kultur i Møre og Romsdal 2018-2020" skal bidra til å løfte fram og kople lokal mat til lokale natur- og kulturopplevingar. Målet er at Møre og Romsdal kan bli Norges mest attraktive og lønsame reiselivsfylke.
Møre og Romsdal fylkeskommune står for finansieringa på 3 millionar kroner årleg i perioden 2018-2020, der ein gjennom delprosjekt skal arbeide med produkt- og konseptutvikling, kompetanseheving, marknadsføring, merkeutvikling, distribusjon og logistikk.
For å lukkast med ei slik satsing er fylket avhengige av å ha med seg både bransjeaktørane og det offentlige virkemiddelapparatet. Prosjektorganisasjonen er snart på plass, ifølgje rådgjevar og konstituert prosjektleiar Lillian Sæther i Møre og Romsdal Fylkeskommune.
Les meir om satsinga .

Stor potensial for næringslivet

Møre og Romsdal er eit stort reiselivsfylke og det største matfylket i Norge, om ein ser grøn og blå sektor samla. Det ligg eit stort potensial i å kople kulturopplevingar saman med mat og reiseliv, det er ein trend ein ser både nasjonalt og internasjonalt.
- Det er eit behov for å skape fleire arbeidsplassar og auke lønsemda i reiselivsbransjen, sa Ragnar Heggdal, leiar i styringsgruppa, i sitt foredrag.
Møre og Romsdal har eit mangfaldig tilbod av reiselivsattraksjonar, natur- og kulturopplevingar, samt ei rekkje lokale produsentar av råvarer med kvalitet i verdsklasse.
- Vi skal løfte fram og kople mat og kultur til våre natur- og reiselivsmål, sa Heggdal.

Satsar breidt

Prosjektet skal bidra til fleire tilrettelagte opplevingar gjennom koplinga reiseliv, natur og mat. og aktørar innan desse næringane.
- For å eksemplifisere; vi må ikkje berre selje fjellturen - vi må selje matopplevinga og kulturhistoria på fjellturen samtidig, seier Heggdal.
Prosjektet har mellom anna fokus på utvikling av nye kommersielle opplevingskonsept, styrke satsinga på heilårsturisme, auke kompetansen og utdanningstakta innan reiseliv, mat og kultur, samt å betre distribusjonen og tilgongen av lokalmat i detaljehandel og reiselivsbedrifter.

Innovasjon Norge ser potensial

Bjarne Øygard, Steinar Johnsen og Marit Giske-Nilsen i Innovasjon Norge i Møre og Romsdal, ser eit stort potensial framover i skjæringspunktet reiseliv, mat og kultur. Dei jobbar med hhv. landbruk, gardsturisme og reiseliv.
- Innovasjon Norge bidreg med kompetanse og personell inn i prosjektet og dette er noko vi har tru på, seier Øygard.
Bjarne Øygard sit forøvrig i styringsgruppa og Marit Giske-Nilsen sit i eit av delprosjekta for satsinga.
Aktørar innan reiseliv, mat og kultur vil no sitje rundt det same bordet 

Publisert: 13.02.2018 15:57

Sist oppdatert: 10.02.2021 14:18