Det seier Herøy-reiar Hans Remøy etter at han har kontrahert ein 27,90 meter lang kystbåt hos Vard Aukra.
- Eg var dialog med tre verft, men Vard Aukra var billegast, seier Remøy, som i satsinga har med seg partnerane Dag Remøy, Vegard Kvalsvik og Helge Kvalsvik.
Prislappen er på vel 60 millionar kroner for den kombinerte autoline- og snurrevadsbåten.
- Vi satsar på å fiske for rundt 20 millionar i året, så dette trur eg vert ei god satsing.

Heilårsdrift

Båten skal vere ferdig i mai 2019, og får namnet Remøybuen, det same som gamlebåten som er seld.
- Eg har tru på kystfiske framover. Kvotene er bra, og om ein står lenge om bord, vil nok fiskarane kunne tene rundt millionen på eit år.
- Men det må arbeidast. Dette er ein båt tilpassa heilårsdrift.

Elektriske vinsjar og tromlar

Båten er teikna av Fosnavåg-selskapet West Maritim, og det vert satsa på isa ferskfisk i kar.
- Vi reknar med å kunne ta rundt 60 tonn fangst, seier Remøy.
Han opplyser at det er ei rekkje nyvinningar om bord.
- Mellom anna er alle vinsjar og tromlar heilelektriske, noko kystflåten tidlegare ikkje har hatt.
- Dette er på mange måtar ein ny generasjons miljøbåt under 28 meter, seier Remøy.

Jaktar meir kvote

I hovudsak kjem båten til å fiske i Barentshavet.
- Vi reknar med å vere rundt 80 prosent av tida i Barentshavet og difor levere nordpå.
- Resten av tida vert vi i Nordsjøen.
Reiarlaget har mellom anna 250 tonn torskekvote, like mykje seikvote og 700 tonn hysekvote.
- Vi jaktar meir kvote, men det er frykteleg dyrt for tida, seier Remøy.

Mest snurrevad

Han seier at hovudreiskapen vert snurrevad.
- Vi kan drive med 30.000 linekrok, men vi reknar med at mesteparten av tida vil det vere snurrevad vi satsar på.
Remøy har sjølv drive hav- og kystfiske i over 40 år, og har i utgangspunktet trappa litt ned.
- Men her kjem eg nok til å verte med ein del. Dette har eg verkeleg god tru på.
Finansieringa er ordna gjennom Sparebank1 SMN, med støtte frå Innovasjon Norge.