Sterk vekst for Brunvoll Volda

Driftsinntektene til Brunvoll Volda auka med over 40 millionar kroner frå 2017 til 2018 (sjå tabell).
Selskapet må tilbake til 2010 for å finne eit år med høgare inntekter og aktivitetsnivået i marknaden auka markant i løpet av 2018, skriv Brunvoll Volda i årsmeldinga for 2018.
Men konkurransen er tøff og marginane små.
I 2010, då selskapet hadde 308 millionar kroner i driftsinntekter, var resultatet før skatt 57 millionar kroner. I 2018 var driftsinntektene 301 millionar kroner og resultatet før skatt 1,5 millionar kroner.
Bedrifta sysselsette 123 årsverk i 2018.

Brunvoll-effekt

Brunvoll-konsernet i Molde kjøpte bedrifta i Volda i 2017, frå Scana Industrier. Ideen var å utnytte at dei to bedriftene har produkt som utfyller kvarandre, slik at dei saman kunne få større slagkraft i marknaden.
Det har lukkast i følgje årsmeldinga:
"Selskapet har et økende salg internt i konsernet i Norge, som til slutt blir solgt videre internasjonalt. Synergieffekten av å bli en del av Brunvoll har åpnet dørene for flere segment og bremset markedsnedturen innen olje og gass."

I pluss på eigedom

Auka inntekter i kombinasjon med svak lønsemd er også status for heile Brunvoll-konsernet. Konsernet hadde 1,7 milliardar kroner i driftsinntekter og eit resultat før skatt på 17 millionar kroner i fjor.
Både i 2017 og 2018 var det sal av eigedom i Molde sentrum som gjorde at konsernet enda i pluss.