Solstad stuper vidare

Børsmeldinga i går - mandag 22. oktober - om at Solstad Offshore må forhandle med långivarane om ei ny refinansiering av selskapet førte til at aksjekursen fall frå 5,15 til fire kroner pr. aksje.

Det er eit kursfall på 22,3 prosent.
Reaksjonen på børsmeldinga hos investorane på Oslo Børs gjekk ikkje over med det store børsfallet i går. Så langt i dag (klokka 11:48) har kursen falle ytterlegare 9,25prosent, til 3,63 kroner per aksje.

Meir enn halvering

Då Solstad Offshore, Farstad Shipping og Deep Sea Supply blei slått saman i juni 2017 var aksjekursen 10,36 kroner pr.aksje. Frå før var Rem Offshore slukt inn i det nye store reiarlaget, der investorane så langt har sett verdien er blitt meir enn halvert sidan samanslåinga. Dagens børskurs verdset heile selskapet til ein milliardar kroner.
Så seint som i januar i år meinte Solstad Offshore-sjef Lars Peder Solstad at det ikkje var naudsynt med ei ny refinansieringa av selskapet.

Fall med Solstad

Meldinga og kursfallet i Solstad Offshore smitta og over på Havila Shipping. Aksjekursen i Havila Shipping fall frå 5,65 til 4,66 kroner i går, og har falle 7,7 prosent så langt i dag. Kursen verdset Havila Shipping til 102 millionar kroner.
Offshorereiarlaget DOF fall 5,6 prosent i går og har falle 5,3 prosent i dag.

Spådde refinansiering

Jan Rune Hurlen, leiar for bedriftsmarknaden i Sparebank1 SMN i Ålesund, sa i sommar at ein ny runde med refinansieringsforhandlingar for offshorreiarlaga ikkje er til å unngå.
Førebuingane til andre runde med refinansieringsforhandlingar kjem til å starte i løpet av hausten, og dei første forhandlingane kanskje neste år, sa Hurlen.
Han ventar at denne gangen blir bankane nøydde til å ta tap og spådde tøffe forhandlingar.
- Eg trur vi kan sjå fram mot ein prosess som blir krevande, og som blir langvarig, sa Hurlen.