I helga har Nina Otterlei (33) hatt 350 deltakarar på toppturfestivalen High Camp Sunnmøre som gjestar. Festivalen er eit samarbeid mellom hotellet og Fri Flyt - eit sportsmagasinforlag og friluftsliv-arrangementselskap.
Alt var fullt, inkludert bedehuset. Ein drøy månad etter at ho starta i jobben er ho klar på at eit slikt trøkk skal det bli meir av.

Om fem år er status slik for Sæbø i Hjørundfjorden: - Ei levande bygd som står for berekraftig verdiar som reisemål, seier Otterlei.
Om fem år har hotellet utvida turistsesongen og styrka posisjonen som eit naturleg lokalsamfunnshotell også for Ørsta sentrum.

Jordbruk og reiseliv

Otterlei vil engasjere seg sterk i satsing på jordbruk som ein del av reiselivssatsinga, og mellom anna satse på lokale leverandørar til restauranten på hotellet.
Det skal styrke Noreg som eit reint, vakker og berekraftig reisemål, og sikre ei miljømessig ansvarleg næring - som vil vere eit trekkplaster for betalingsdyktige turistar året rundt.
I ei slik satsing blir det feil å opne Hjørundfjorden for cruisetrafikk, slik Otterlei ser det.

Samarbeid

Sagafjord Hotel samarbeider mellom andre med Juvet landskapshotell i Valldal, der Otterlei var nestleiar i tre år før ho fekk jobben på Sæbø.
- Eg er heilt overbevist om at samarbeid er heilt avgjerande for eit godt reiseliv, seier Otterlei.

Hotellet driv og i samspel med Rekkedal Gjestehus nokre kilometer lenger oppe i dalen. Rekkedal Gjestehus tek mot gjester til middag, men driv ikkje med overnatting i eigen regi.
I Nordangsdalen, ei ferje og ein kort biltur frå hotellet på Sæbø, ligg Hotel Union Øye og Villa Nordangdal.
- Det er ein rikdom å ha dei rundt seg, seier Otterlei.

Heimlengsel

Etter utdanning og yrke som oversetjar og tolk i Italia fekk heimlengselen overtaket. I 2012 fekk Otterlei ansvaret for butikk og kafè på Jugendstilsenteret og Kube i Ålesund, før ho året etter drog til Valldal.
Erfaringane derifrå er noko av grunnen til at Otterlei vil styrke aktivitetstilbodet på hotellet, både retta mot gjestar på private turar og kundar som gjestar hotellet som ein del av ein konferanse eller eit møte.
For å få til det vil Otterlei involvere aktørar i lokalsamfunnet enda meir i drifta. Det handlar om alt frå ein enkelt tur med bål og kaffi i fjøra, via fiske- eller padleturar på fjorden til krevjande toppturar på ski.
- Her er mange aktørar som har lyst til å ta med folk ut på tur, seier Otterlei.

Lønsemda må opp

Sidan 2012 er hotellet eigd av Gjørtz Invest, Handelshuset Rønneberg og Tryggestad Eiendom og Finans. Dei gjekk inn og sikra vidare drift. I etterkant dei også opna lommeboka og satsa meir på hotellet trass i resultat som har svinga mellom opp- og nedturar.

Å få opp lønsemda er heilt sentralt, seier Otterlei.
Det handlar om å få ut meir av potensialet som ligg i hotellet, Sæbø og Hjørundfjorden.
- Eg tenkjer tradisjonar når det kjem til merkevarebygging, men utradisjonelt når det kjem til hotelldrift, seier Otterlei.
Ho vil førebels ikkje gå i fleire detaljar om korleis hotellet skal drivast, men seier ho vil jobbe for å få ei verdiskaping som vil kome både reiselivsdestinasjonen, lokale og internasjonale turistar, leverandørar, fastbuande og hotellet i seg sjølv til gode.
2016 reknskapen er ikkje offentleggjort enno, men styreleiar Jon Ketil Gjørtz sa til NETT NO i januar år at inntektene passerte ti millionar kroner i fjor. Det er er vesentleg forbetring samanlikna med 2015, men selskapet enda likevel i minus.