Etter at aksjehandelen på Oslo Børs stengte i går ettermiddag, torsdag 15. oktober, varsla Hofseth Biocare at selskapet ville hente inn inntil 200 millionar kroner i ny eigenkapital.

Litt etter midnatt, i dag fredag 16. oktober, var kapitalutvidinga gjort.
Emisjonen var "betydeleg overteikna", i følgje børsmeldinga. Det betyr at selskapet kunne henta inn meir pengar, om det hadde ønskt det.

Børsrakett

Hofseth Biocare vidareforedlar avskjær og restråstoff frå lakseslakteri til olje-, mjøl- og beinprodukt. Selskapet arbeider mellom anna med å få godkjenning for å kunne markedsføre at nokre av produkta har positive helseeffektar, og siktar seg og inn mot legemiddelmarknaden.

Selskapet er børsnotert, med hovudkontor i Ålesund.
Så langt har selskapet gått med underskot, men forventningane til framtidig lønsemd sende aksjekursen frå 2,39 kroner pr. aksje 7. juni 2019 til 10,68 kroner pr. aksje 27. november 2019.
Det som utløyste kursstigninga var ein intensjonsavtale med Nestlé-selskapet Garden of Life om distribusjon av Hofseth-produkt i USA under helsekostleverandøren Garden of Life sitt varemerke. Avtalen er framleis ein intensjonsavtale.

I mars i år hadde kursen falle til under sju kroner, men i midten i juni var den like under 10 kroner igjen og sluttkurs i går var 9,04 kroner pr. aksje. Den kursen verdsette selskapet til 2,99 milliardar kroner.

Kurs 8,10 kroner

Kapitalutviding i Hofset Biocare er gjort til 8,10 kroner pr. aksje fordelt på 24,7 millionar nye aksjar.
Etter kapitalutvidinga er eigarskapen til selskapet fordelt på 354,9 millionar aksjar.
Kapitalutvidinga som starta i går var ein såkalla retta emisjon, der berre ein fåtal investorar fekk sjansen til å vere med. I etterkant vil selskapet gjennomføre ein mindre emisjon, der eksisterande aksjonærar som ikkje fekk vere med kan kjøpe inntil 4,98 millionar aksjar til kurs 8,10 kroner.
I fjor sommar styrka Hofseth Biocare eigenkapitalen med 118 millionar kroner, der 103 millionar i kontantar blei hente inn og gjeld gjort om til aksjar.