- Vi står på trappene til å få ei forandring på eigarsituasjonen i selskapet vårt, seier Navekvien.
Gjennom sitt heileigde selskap Mermaid er nordfjordingen eineeigar av West Dykkerservice i Måløy, 70 prosent eigar i Sunnfjord Dykkerservice i Florø og 50 prosent eigar i Møre Dykkerservice i Ørsta.
Til saman er det snakk om selskap med over 100 millionar kroner i driftsinntekter og rundt 70 tilsette.

Eks-kokk

Navekvien er utdanna kokk, men gjekk lei av kokkelivet og greip sjansen til forandring då ein kjenning i 1991 spurde sportsdykkaren om han kunne ta eit oppdrag i oppdrettsanlegget hans.
Sidan har det balla på seg, og selskapa i Mermaid-systemet er i dag det klart største dykkarfirmaet i oppdrettsbransjen.

På tide med skifte

No er det på tide med eit skifte på nytt, meiner Navekvien. Han har vore over 20 år i bransjen, og bransjen har blitt stadig meir kapitalkrevjande. Samstundes er det rom for å vekse ved å erobre større deler av marknaden frå dei mindre konkurrentane.
Alt dette tilseier at det er fornuftig å få inn nye investorar.
- Det er store verdiar, det er på tide å sjå på ein ny eigarstruktur, seier Navekvien.

Betre enn tala viser

Mermaid offentleggjer ikkje noko konsernreknskap, men dei tre dykkerselskapa utgjer hovudaktiviteten i systemet. Tala for det største selskapet, West Dykkerservice, gir imidlertid ikkje det fulle biletet av stoda. (Sjå tabell)
Selskapet leiger alt utstyret frå søsterselskapet Mermaid Drift og resultatet derifrå - eit overskot før skatt på seks millionar kroner i 2013 - må leggast saman med resultatet i West Dykkerservice for å få eit rett bilete av lønsemda.

Færre timar i sjøen

Å vaske oppdrettsnøtene fri for groe er ein viktig jobb for dykkerselskapa. Men det er ikkje lenger dykkarane som gjer jobben. Den er overtatt av undersjøiske vaskemaskiner, som blir fjernstyrte av dykkarane om bord i arbeidsbåten. Det betyr større investeringar i utstyr.
Slik er det for dei fleste arbeidsoppgåver, maskiner og ubemanna undervassfarty blir brukte i staden for dykkarane.
- Dykkertida er sterkt redusert. Vi jobbar for å få folk opp av sjøen, seier Navekvien.

Snakkar med fleire

Navekvien har tidlegare vendt tommelen ned for bod på selskapet, men seier han no er i samtalar med moglege kjøparar.
- Vi har hatt både samtalar og forhandlingar. Vi har fleire som er interesserte i å kjøpe, seier han.