Opne lasteromsluker årsak til havari

14. august kantra Herøy-båten Havstein under lasting av eit notkast av makrell i Syltefjorden i Vanylven.
Mannskapet på fire kom seg over i ein mindre båt og vart berga.
Kantringa skjedde trass i at vêret var fint, og sjøen var smul.

70-80 prosent last

I ein fersk rapport slår Sjøfartsdirektoratet fast at årsaka til havariet skuldast at luker i dei tre lastetankane stod opne under lasting av makrellfangsten.
Då den 12 meter lange båten krenga til styrbord og deretter kantra, var nivået i lastetankane på 70-80 prosent.

Må fjerne lukene

Sjøfartsdirektoratet slår fast at fartøyet ikkje var stabilt under lasting ettersom luker i langskipsskotta stod opne og makrellen dermed fritt kunne strøyme gjennom lukene.
Direktoratet krev no at andre fartøy med tilsvarande luker i langskipsskott må fjerne lukene og tette skotta permanent.