Offshore-rente for Ekornes-eigar

I invitasjonen til å investere i obligasjonslånet på to milliardar kroner blir det signalisert at renta på lånet kan bli sju prosent, pluss tre månadars Nibor. Tre månadar Nibor er renta på lån mellom norske bankar, med tre månadars løpetid. No er den renta på 1,34 prosent.
Om interessa for lånet ikkje er større enn venta betyr det at renta på lånet blir over åtte prosent.
Ekornes-eigaren Ekornes QM Holding vil låne to milliardar kroner i obligasjonsmarkanden for å refinansiere banklån som blei brukt til å kjøpe ut dei tidlegare Ekornes-eigarane i fjor. Ekornes QM Holding er eigd av kinesiske Qumei Home Furniture Group og eig 90,5 prosent av aksjane i Ekornes.

Ekornes QM Holding prøvde seg også i obligasjonsmarknaden i fjor haust, men enda med å legge planen på is.

Offshore-rente

Rentenivået som blir signalisert for Ekorneslånet er i nærleiken av kva offshoreselskapet DOF Subsea fekk då selskapet lånte pengar i obligasjonsmarknaden i fjor, som det første offshoreselskapet på lang tid.
900 millionar kroner fekk DOF Subsea låne, og renta var åtte prosent, pluss nibor. Det betyr 8,3 prosent med dagens nibor-rente.

Fem prosent

Til samanlikning fekk Hexagon Composites nyleg låne 1,1 milliardar kroner i obligasjonsmarknaden til like over fem prosent rente. Der hadde tilretteleggarane og selskapet signalisert at renta kunne bli rundt ein halvt prosentpoeng høgare, men stor interesse for å vere med på lånet pressa rentenivået ned.

I november i fjor fekk Kongsberg Gruppen på plass eit todelt obligasjonslån på til saman ein milliard kroner. Rente på det eine delen av lånet er 2,2 prosent og 2,5 prosent på den andre.