Ny start etter bråstopp i fjor

InStordal hadde to millionar kroner i driftsinntekter i sitt første år, 2017, og Leganger venta vidare vekst i 2018. I staden fall inntektene til knappe 200.000 kroner, og aktiviteten var minimal i store deler av året.

No har Leganger fått Ulstein-selskapet Constructer med som samarbeidspartnar. Elementa til InStordal-hyttene vert laga hos Constructer, InStordal har tilsett ein seljar, og Leganger seier 2019 vil gi større driftsinntekter enn 2017 og bli det beste året til selskapet så langt.

Stoppa opp

I april i fjor gjekk det ut ei pressemelding om at Inno-Hus og Artec Holding i Ålesund skulle gå inn som medeigarar i Stordal-selskapet og at hytteelementa skulle produserast ved Inno-Hus sin fabrikk i Litauen.
Inno-Hus og Artec Holding skulle eige ein tredjepart kvar, Leganger resten, i følgje ein artikkel i Sunnmørsposten 13. april 2018.
Det blei det ikkje noko av.
For InStordal gjorde denne prosessen at det ikkje var aktivitet i selskapet i store deler av 2018.

Justerer produksjonen

Ideen bak InStordal er å byggje rimelege og lettbygde hytter og gjere storparten av bygging innandørs.
Då produksjonen vart gjort i Stordal - i deler av produksjonslokala som tidlegare husa møbelproduksjonen til Vad - vart hyttene bygd heilt ferdig innandørs og sett på ein lastebil.
Måla på hyttene er tilpassa at dei kan fraktast på eit lasteplan ferdig monterte, men utfordringa med transporten og ikkje minst å få fullt ferdig hytter på plass på tomta gjer at InStordal-hyttene no blir produsert i element og ferdig monterte og innreia på hyttetomta.

Enkelt og rimleg

InStordal har satsa på hytter i ein prisklasse som gjer at selskapet kan nå nye grupper.
Det er flate tak og store vindu, og prisar mellom 0,9 og 1,8 millionar kroner.