- I perioden 2014 til 2017 var det så godt som null sal til riggmarknaden. I fjor selde vi fire forankringssystem. Hittil i år har vi kontrakt på tre system.
- Det ser absolutt lysare ut enn på fleire år, seier Øystein Ryste, salssjef for dekksmaskiner til riggmarknaden i Rolls-Royce.
Kvart slikt system kostar mellom 50 og 100 millionar kroner, og omfattar både dekksmaskiner og anna utstyr som skal halde riggane i fast posisjon. Ankerkjettingane er det derimot andre selskap som leverer.

Større leveransar

Ryste seier at det hjelper også at riggane vert større, i tillegg til at det har kome strengare krav til sikkerheit.
- Dette har ført til at kvar leveranse også vert større.
Medan det før var vanleg å ha to ankerkjettingar festa til kvart hjørne på ein rigg, er det no vanleg med både tre og fire.
- I fjor leverte vi forankringssystem til ein rigg med heile 17 festepunkt. Til fleire, til betre for oss.

- Spelar kvarandre gode

Rolls-Royce i Brattvåg har i mange år samarbeidd tett med I P Huse på Harøya, som har ansvaret for mekanisk design og produksjon av selve vinsjene. Rolls-Royce har på sin side blant anna ansvaret for sal- og service, marknadsføring og prosjektleiing samt design, produksjon og levering av driv og kontrollsystemet til vinsjene.
- Vi har ein samarbeidsavtale som starta på førtitallet, da Brattvåg blei grunnlagt som «Hydraulik AS». Avtalen er framleis gjeldande.
Dagleg leiar Morten Hopland i I P Huse seier at samarbeidet er ein suksesshistorie.
- Dette er ein vinn-vinn-situasjon. Vi spelar kvarandre gode og bidreg til å utvikle kvarandre.

Ikkje lett å kopiere

På Harøya er det no rundt 115 tilsette, medan det er rundt 350 i Brattvåg.
Hopland meiner at framtida ser lys ut, spesielt ettersom ein har fått utvikla system som ikkje er så lette å kopiere for andre aktørar.
- Blant anna brukar vi mykje høgfast stål kombinert med tette band til vår eigen verkstad for optimalisering av produkt og produksjonsmetodar. Dermed vert vårt utstyr lettare enn utstyr laga av vanleg stål.
- Lav vekt er viktig for riggselskapa.
Hopland viser også til at utviklinga av lukka girsystem har vore ein suksess.
- Vi har fått fantastisk gode tilbakemeldingar på det lukka systemet, som reduserer behovet for vedlikehaldsarbeid samstundes som ein slepp korrosjon frå sjøvatn.

Ingen Kina-produksjon

I praksis vert alle riggar i dag bygde i Asia, først og fremst i Kina, Singapore og Korea.
Øystein Ryste seier at det har vore viktig for selskapet å verne om eigne patentar.
- Det er ingen tvil om at det er stor interesse for å sjå nærare på korleis vi utviklar og produserer våre dekksmaskiner. Så langt har vi klart å verne om eigne produkt.
- Dette er også ein av grunnane til at vi ikkje har satsa på produksjon i Kina. Utstyret vert i staden produsert på Sunnmøre, og frakta til Asia på båt.

Glad for Kongsberg-kjøp

Han seier at det også er viktig at ein har kontroll på alle deler av produksjonen.
- Dette gjer også at vi er fleksible. Normalt brukar vi åtte månader på produksjon av eit komplett forankringssystem, men vi er fleksible og tilpassar oss kundane.
Plassjef Charles Kvalvik ved Rolls-Royce i Brattvåg seier at optimismen er i ferd med å vende tilbake.
Han seier at alle tilsette var spente på kven som vart eigar av Rolls-Royce Commercial Marine. Han er glad for at det vart Kongsberg Gruppen.
- Ei god løysing, som eg trur er riktig for den norske maritime industrien, seier han.

Mange lærlingar

På spørsmål om det kan verte justeringar i talet på tilsette fremover, svarer Kvalvik at det ser bra ut per i dag. Dei jobber med interne rokkeringar slik at dei områda i verksemda som har mest last også har mest folk.
Han legg til at det vert satsa stort på lærlingar.
- Vi har eit svært godt samarbeid med Haram vidaregåande skule. No har vi 12 lærlingar i sving

,

og har planer om å holde på denne satsinga i åra som kjem.
- Så langt har vi få problem med rekrutteringa.