- Vi vil sjå på organisk vekst som grunnpilaren i den vidare reisa, seier partnar Ulrik Smith i FSN Capital etter at FSN Capital har varsla bod på heile selskapet.
Bodet på 30,10 kroner pr. aksje verdset Saferoad til to milliardar kroner. Ved børsslutt tysdag var aksjekursen 20,50 kroner pr. aksje.

Auka lønsemd

Saferoad starta med samanslåinga av Ørsta Stålindustri og Euroskilt i 2007 og har gjennom ei rekkje oppkjøp i dag datterselskap over heile Europa. Konsernet har 2700 tilsette, fordelt på selskap i 20 land. Hovudkontoret er i Oslo og Vik Ørsta, med anlegg i Ørsta og Vik i Sogn, er det viktigaste datterselskapet.
Organisk vekst betyr vekst ved at selskap som er i konsernet aukar driftsinntektene. Om marknaden er i vekst kan dei vekse ved å oppretthalde marknadsandelen. Om marknaden står stille, eller selskapet vil ha ein høgare vekst enn veksten i marknaden, må Saferoad auke sin andel av marknaden.
Smith seier vekst er nøkkelen til auka lønsemd.
- Vi trur lønsemda vil auke når ein veks, seier han.

Tre vekers frist

Varselet om at FSN Capital byr på alle aksjane i Saferoad som kom i dag blir fulgt opp av eit formelt bod, som aksjonærane får i neste veke. Deretter er det tre vekers frist på å svare. FSN Capital har stilt som vilkår at investeringsfondet får hand om minst 90 prosent av aksjane.
Smith vil ikkje kommentere kor sannsynleg det er at FSN Capital får ja får eigarane av minst 90 prosent av selskapet, men viser til at bodet er tilrådd av styret og leiinga i Saferoad og at FSN Capital allereie har fått tilsagn om å kjøpe 63,6 prosent av aksjane i Saferoad.

5-7 år eigarskap

Frå 2008 til 2017 sat fond kontrollerte av svenske Nordic Capital som eigar i Saferoad.
I fjor vart selskapet børsnotert, men får Nordic Capital kontroll blir Saferoad tatt av børs, i alle fall for fleire år framover.
Smith seier FSN Capital sine fond typisk sit som eigar i fem til sju år, og at han ikkje ser nokon grunn til å endre på den strategien når det gjeld Saferoad.