Milliardnedskriving i DOF

Kansellerte kontraktar og kundar som vil reforhandle avtalar, saman med forverringa av marknaden på grunn av koronaepidemien gjer at offshorereiarlaget DOF skriv ned verdien av flåten med 1,5 milliardar kroner i første kvartal.
I tillegg kjem eit urealisert valutatap på 2,9 milliardar kroner, som gjer at resultatet før skatt blir minus 4,2 milliardar kroner.

Utsett refinansiering

I starten av april bad reiarlaget kreditorane om meir tid til å forhandle om ei refinansiering av selskapet.

Den utsetjinga fekk selskapet. I kvartalrapporten for 1. kvartal skriv selskapet at det er inngått ein "standstill" avtale til 30. juni.

67 skip

DOF har ein flåte på 67 skip, med ein gjennomsnittleg utnyttingsgrad på 81 prosent. Utnyttingsgraden fortel kor stor del av flåten som er i arbeid og ein generell tommelfinger i marknaden er at det er kjøpars marknad inntil utnyttingsgraden når omlag 90 prosent.
18 av skipa til DOF ligg i opplag i slutten av mai.
Selskapet Møgster Mohn Offshore eig 48,95 prosent av aksjane i DOF. Det selskapet er i ferd med å bli delt mellom Møgsterfamilien på Austevoll og Fredrik W. Mohn.