Merkar problema til tysk stålindustri

- Ja, det såg veldig bra ut for i år. Vi planla å selje 75.000 tonn, opp frå 50.000 tonn i fjor.

Det seier dagleg leiar og hovedaksjonær Robert Welsvik.

Med ein planlagt last på 8.000 tonn i første veka i juni, vil det i år ha gått 27.000 tonn olivinsand frå Steinsvika i Volda til mottakarane i Tyskland.

- Deretter veit vi ikkje meir. Det vi har fått beskjed om er at det vert lite aktivitet ved tyske stålverk fram til september.

- Dei tyske stålverka leverer i hovudsak til bil- og oljeindustrien, og begge deler slit no, seier Welsvik.

Godt fjorår
I fjor omsette Steinsvik Olivine for 8,8 millionar kroner, opp frå 3,3 millionar kroner året før.

Resultatet før skatt enda på 2,1 millionar kroner, medan ein året før gjekk så vidt i minus.

2019 vart dermed eit rekordår både omsetnings- og resultatmessig etter at Robert Welsvik kjøpte Steinsvik Olivine i 2009.

Set investeringar på vent
Welsvik eig 51 prosent av aksjane i gruveselskapet han overtok i 2009.

Dei andre aksjane er likt fordelte mellom dei tyske selskapa Intocast Aktiengesellschaft og Scheruhn Industriemineralien.

- Vi var godt fornøgde med fjoråret. I år hadde vi planlagt å gjere ein del store investeringar, men det meste er no sett på vent, seier Welsvik.

Stor forekomst
Siste åra har Steinsvik Olivine konsentert seg om å levere olivin til bruk i produksjon av eldfaste omnar, men no går det meste til tyske aluminiumsindustrien, som normalt har store leveransar til tysk bilindustri.

Olivinforekomsten i Steinsvika er i utgangspunktet kalkulert til å vere på 1,4 millionar tonn i dagbrot og ytterlegare 40 millionar tonn som må takast ut i gruvedrift.

Selskapet har ikkje langsiktig gjeld, og leiger inn tilsette.

- Det er nomamlt seks personar som arbeider ved Steinsvik Olivine, seier Welsvik.