Legg ned i Vanylven - gjer stålarbeid i Polen

- Dette er ein del av ein langsiktig strategi. Vi ser på korleis vi skal byggje båtane billegast mogleg, seier verftsdirektør Kristian Sætre.
Han seier at kostnaden med å oppretthalde produksjonen i Vanylven har vorte for stor.
- Ja, vi har billegare alternativ.

28 tilsette

Totalt er det i dag 28 tilsette ved avdelinga på Fiskåholmen i Vanylven.
- Alle vil få tilbod om arbeid i Ulsteinvik, seier han.

Lang epoke

Ulstein har hatt produksjon i Vanylven sidan 1973. Det er dermed ein 42 år gamal epoke som er over.
På 90-talet var ein på det meste over 100 tilsette ved avdelinga, og Ulstein på Fiskåholmen var dermed ein av dei viktigaste arbeidsplassane i kommunen.
- Spesielt etter 2002 har talet på tilsette vorte redusert, seier Sætre.

Polen overtek

Men heilt fram til i dag har dei tilsette i Vanylven bygt seksjonar, som har vorte slept til verftet i Ulsteinvik.
No skal meir av stålarbeidet gjerast i utlandet.
- I fleire år gjorde vi stålarbeidet i Ukraina. No dreier set seg i første rekkje om Polen, seier Sætre.
Han seier at avgjersla om nedlegging i Vanylven ikkje er eit resultat av at det strammar seg til i verftsindustrien.
- Nei, dette er ein del av ein langsiktig strategi.