Kuttar papiravis-dag

Etter at VikebladetVestposten gjekk over frå tre til to papiraviser i veka, har Møre-Nytt vore den einaste Sunnmørsposten-eigde lokalavisa som framleis held på tre utgåver.

Men no er det slutt også for Møre-Nytt. Når avisa går over til to papirutgåver i veka i samband med sommarferien, blir det verande slik også etter at sommarferien er over.
- Dei yngste lesarane er heildigitale. Men også dei eldre sine medievanar endrar seg, seier redaktør og dagleg leiar Svein Aam til Møre-Nytt.

I tur og orden

Avisene under Sunnmørsposten-paraplyen har kutta papiravisdagar i tur og orden.
I Nordfjord starta Fjordenes Tidende i Vågsøy og Fjordingen i Stryn papirkuttinga i 2015. Begge gjekk ned frå tre til to utgåver i veka.
Fjordabladet på Nordfjordeid gjekk ned frå tre til to papirutgåver i 2016 og Sunnmøringen på Stranda gjekk same år frå to til ei papiravis i veka.

Seks dagar i veka

Sunnmørsposten er eigd av Polaris Media Nordvestlandet, eit selskap i Polaris Media-konsernet.
Førebels kjem både Sunnmørsposten og søsteravisa Romsdals Budstikke med papiraviser seks dagar i veka. Åndalsnes Avis, som er eigd av Romsdals Budstikke, har tre papirutgåver i veka.