Konkurskrav mot Emerald Fisheries

Konkursbegjæringa skal behandlast hos Søre Sunnmøre Tingrett tysdag 30. august, klokka 13.00. Det er sett av ein time til saka.
Emerald Fisheries driv krilltrålaren "Juvel" og er eit dotterselskap av Olympic Holding i følgje den sist tilgjenglege årsmeldinga, for 2014. Stig Remøy er største eigar i Olympic Holding.
Saman med Aker Biomarine er Emerald Fisheries ein av aktørane i krillfisket i Antarktis.
I 2014 hadde Emerald Fisheries driftsinntekter på 152 millionar kroner, eit driftsresultat på 18,3 millionar og eit underskot før skatt på 10,6 millionar kroner.
I følgje Marine Traffic ligg "Juvel" no for anker ved Rotterdam.

Tyngre marknad

Krill blir mellom anna brukt som råstoff for produksjon av omega 3.
Utflating i veksten i omega3-marknaden i USA skapte vanskar for krill-leverandørane. Fram til og med 2012 var det gode tider, så snudde det.

Strid med konkurrent

I USA har konkurrenten Aker Biomarine saksøkt fleire krillrelaterte selskap med Stig Remøy på eigarsida. Striden gjeld bruken av to patent, som Aker Biomarine meiner er krenka.
Selskapa som er saksøkt er Olympic Holding AS, Rimfrost AS, Emerald Fisheriers AS, amerikanske Rimfrost USA, Avoca Inc og canadiske Biorginal Food & Science Corp, i følgje nettavisa Intrafish.

Milliardsatsing

Stig Remøy anslo at det er investert i underkant av ein milliard kroner i krillsatsinga då han snakka om krillfisket i eit fordrag på sjømatmøtet i regi av fylket, Innovasjon Norge og Møreforsking i Ålesund i april 2015.
I foredrag sa han og at det kunne bli behov for nye store investeringar i marknadsarbeid og produktutvikling.

NETT NO har ikkje lukkast i å få ein kommentar frå dagleg leiar Bjørnar Kleiven eller styreleiar Stig Remøy i Emerald Fisheries.