Kleven sjefen No maa vi tene pengar
KONTROLL: Kleven-direktør Karsten Sævik rosar kvaliteten på båtane som har vorte bygde på Kleven, men det har ikkje vore like god kontroll på alle delar av prosessen. No tek han ei rekkje grep.
Nytt

Kleven-sjefen: - No må vi tene pengar

Færre oppdrag, mindre variasjon i oppdraga og full kontroll på prosess og kostnader. Det er resepten Karsten Sævik serverer for å snu Kleven-skuta.

13.07.2018
- Kontroll er nøkkelordet. Skipsbygging er komplisert, og vi må få tilbake kontrollen over alle delar av produksjonen.
- No må vi tene pengar, seier konsernsjef Sævik.

God kvalitet - dårleg kontroll

Han tok til i jobben med å snu Kleven-skuta i slutten av mai, og seier at situasjonen ved Ulsteinvik-verftet er stort sett slik han hadde trudde det var.
- Her har ein i generasjonar vore veldig flinke til å byggje båtar. Sluttprodukta har vore svært bra, og kundane eg har snakka med har vore strålande fornøgde.
- Problemet har vore at ein ikkje har tent pengar, i stor grad på grunn av manglande kontroll på fleire av operasjonane i verdikjeda.

Redusert breidde

Kleven har i periodar hatt ei svært lang ordrebok, med stor breidde i oppdraga. Parallelt har det vorte bygt mellom anna fiskebåtar, brønnbåtar, ekspedisjoncruiseskip, luksusyachtar og offshoreskip.
Sævik seier at i framtida vil ein truleg ikkje satse så breidt.
- Det står på køyreplanen til det nye styret å diskutere strategi. Det viser seg at det er vanskeleg å vere best på å bygge alle typar skip, så det endar truleg med at vi kjem til å satse smalare og på oppdrag som vi veit vi har kompetanse til å gjennomføre på ein god måte.

Redusert volum

I praksis kan dette også føre til at det vert lenger mellom oppdraga.
- Ja, volumet vil gå ned. Det har i periodar vore altfor mange prosjekt på gang samstundes.
Sævik seier at det likevel ikkje er sikkert at det vert så mange færre tilsette ved verftet.
- Nei, dette er det for tidleg å konkludere noko på. Det vil også vere svært avhengig av kva type skip ein ynskjer skal byggast her. Det kan tenkjast at det vert behov for både oppbemanning og nedbemanning innanfor enkelte avdelingar.

- Ikkje langsiktige eigarar

Kleven-verftet er no heileigd av dagens Hurtigrute-aksjonærar gjennom selskapet KVE Holding etter at restruktureringa no er ferdig. I tillegg til verftet, eig ein også selskapa Kleven Maritime Technology og Kleven Maritime Construction.
Dei nye verftseigarane, med Petter Stordalen som sentral aktør, har gått inn med frisk kapital parallelt med endra låneavtalar og dekking av prisauke for ekspedisjonscruiseskipa Roald Amundsen og Fridtjof Nansen.
Stordalen og resten av Hurtigrute-aksjonærane gjekk inn for å berge Kleven Verft og dermed sikre at dei to prestisjeprosjekta vart ferdiggjort på ein fullgod måte.
Sævik seier at Hurtigrute-aksjonærane ikkje er langsiktige eigarar.
- Nei, dei har vore tydelege på at dei ikkje har eit langsiktig perspektiv med seg sjølve som verftseigarar, samstundes som dei ser verftet i eit langsiktig perspektiv.
- Målet for meg som leiar av selskapet no, er at dette skal vere eit aktivt og attraktivt skipsbyggingsverft.

- Som å leie eit fotballag

Sævik rosar dei tilsette ved verftet.
- Her er mange fantastisk dyktige tilsette, og eg har vorte svært godt motteken.
Sævik seier det er kjekt å vere tilbake i verftsnæringa igjen. Han var sjølv adm. dir ved Ulstein verft i perioden 2006-2012, før han overtok som konsernsjef i Remøy Group.
- Dette er som å leie eit fotballag. Alle må ha trua, og alle lagdelar må fungere for at laget skal vinne.
- Eg har god tru at dette skal vi få til.
Dette er som å leie eit fotballag. Alle må ha trua, og alle lagdelar må fungere for at laget skal vinne

Publisert: 13.07.2018 10:54

Sist oppdatert: 10.02.2021 14:24