Klesforhandlar kastar inn handkleet

Sunnmøre tingrett opna siste veke for selskapet Westcoast i Herøy. Firmaet har dreve import og sal av arbeidsklær som hanskar, vernesko og støvlar sidan 1991.
Til NETT NO viser dagleg leiar og eigar Lauritz Skeide til at eigenkapitalen er tapt og at det ikkje vert skote inn meir i bedrifta. Han viser til bustyrar for fleire spørsmål om saka.

Flytta til Herøy ved årsskiftet

Skeide overtok aksjane og leiinga i selskapet etter Egil Kvalheim i 2017. Tidlegare heldt bedrifta til ved Deknepollen ved Måløy, men flytta til Dragsund i Herøy ved årsskiftet.

Kostnader i samband med flyttinga, skal ha vore medverkande til at selskapet gjekk over ende, opplyser bustyrar Jørund Knardal til NETT NO.
– Leiinga viser også til hard konkurranse, og at omsetninga gjekk ned på nokre viktige produkt, seier Knardal om kva han har fått opplyst om årsakene til konkursen.

Har lager med hanskar og kle

Advokaten påpeiker at det er for tidleg i buarbeidet, til at han har full oversikt. Ifølgje oppbodsmeldinga er det ei samla gjeld på 4,6 millionar i selskapet. Det er også eit varelager med arbeidshanskar og arbeidskle med ein opplyst verdi på nær tre millionar.
Westcoast disponerer eit 1100 kvadratmeter stort lager i det tidlegare Fristadbygget ved Dragsund.
– Realisasjonsverdien ved ein konkurs vil vere lågare. Det er mogleg at buet vil abandonere til Sparebank 1 Midt Norge som er hovudpantehavar, seier Knardal.

Les også:

Minus dei siste åra

Westcoast sine rekneskap viser ein solid økonomi i ein årrekke fram til 2016. Omsetninga har svinga mellom seks og åtte millionar, og gjekk berre i minus eitt av desse åra.
Resultata dei siste åra har gått feil veg og år 2017-2018 enda med eit samla underskott på kring 2,7 millionar.
Ifølgje bustyrar har det vore tre tilsette i det siste, ein på lageret ved Dragsund og ein deltidsstilling i Måløy, i tillegg til dagleg leiar.

Les også: