Heile familien bak restaurantsatsing

- Hittil har det gått veldig bra.
Imer Morina kom til Ålesund som flyktning frå Kosovo. Sidan 2018 har han drive Mølla Bar saman med Besnik Luma i regi av selskapet Møre Restaurant & Pub. Begge var tidlegare tilsette på Mølla, og sørga for ny drift då dei tidlegare eigarane trekte seg.
Men då restauranten Real American Steakhouse eit par hundre meter lenger borte i gata vart til sals, satsa Morina saman med familien også på rein restaurantdrift.
- Alle hjelper til, og vi synst vi har fått til eit veldig bra konsept.
Her er spesialiteten hamburger.
- Alt vert laga av oss sjølve frå botnen av, seier Ariana Morina (23).

Ope under korona

Ho er utdanna sjukepleiar, men er no servitør i familiebedrifta, der både mora, ei søster og ein bror arbeider.
- Veldig kjekt at vi alle kan vere saman om dette, seier ho.
Restauranten vart overtatt i desember i fjor, og har hatt ope under heile koronaperioden.
- Vi måtte overleve etter å ha gjort denne satsinga, seier Imer Morina.

Fullt hus

Siste vekene har det vore fullt hus kvar kveld, til liks med dei fleste andre restaurantane i Ålesund.
Imer Morina seier at for å overhalde smittvernreglane har ein gått ned frå å kunne ta imot 84 gjestar til å ta imot 50.
- I fellesferien har vi måtta sagt nei til mange gjestar.
- Frå å ha kun norske gjestar, ser vi no at det også vert stadig fleire utlendingar.