Det er den tidlegare storaksjonæren i Optimar - investeringsselskapet Credo - som no returnerer til fiskeutstyrsindustrien på Nordvestlandet.
Saman med First Process Holding skal Credo Partners kjøpe Havyard Group sin aksjepost på 75 prosent i MMC First Process. First Process Holding eig resten av aksjane, 25 prosent, i MMC First Process. Partane har inngått ein intensjonsavtale om handelen og siktar mot å ha på plass ein endleg avtale seinast 15. juni.

Credo Partners blei medeigar i fiskeri- og oppdrettsindustri-utstyrsleverandøren Optimar i desember 2012 og eigde 50,1 prosent då det tyske familieselskapet Haniel kjøpte Optimar i desember 2017.
Fiskeri- og oppdrettsutstyrsindustriverksemda til Havyard Group - der MMC First Process er den dominerande - hadde 407 millionar kroner i driftsinntekter i 2018 og fekk eit driftsunderskot på 15,3 millionar kroner. Tilsvarande tal for 2017 var 427 millionar kroner i driftsinntekter og 22,1 millionar kroner i drifsoverskot.

Dramatisk børsfall

Etter at børsen stengte torsdag 21. mars, berre tre veker etter at tala for 2018 var lagt fram, kom Havyard Group med ei melding om ytterlegare tap på rundt 100 millionar i 2018.
Det meir enn dobla underskotet for 2018 samanlikna med kva Havyard melde i første omgang.
Dagen etter reagerte investorane på børsen med å nesten halvere verdien av Havyard.
Dei uventa tapa gjorde at selskapet kunne gjere at Havyard var i brot med lånevilkåra, og førte til at selskapet måtte diskurtere med långivarane: "Det er imidlertid igangsatt dialog med långivere for å minimere effektene av slike brudd. Videre er det satt i gang interne tiltak, samt at selskapet er i god dialog med kunder.", heitte det i børsmeldinga 21. mars.

Dagens børsmelding kom før børsen opna. Ved børsslutt fredag i førre veke var aksjekursen i Havyard Group 4,50 kroner. Ved børsopnig i dag steig den til 6,16 kroner pr. aksje, før den fall. Klokka 09:47 var den 5,40 kroner pr, aksje.

Saman i 2017

Havyard Group og First Process melde i mars 2017 at dei hadde skrive under ein intensjonsavtale om å slå saman Havyard Group sitt fisker- og oppdrettsutstyrsselskap MMC med Ørskogselskapet First Process.
- Vi har vore gjennom ein fase der vi har kutta kostnadar, men no føler vi at vi er på offensiven. Du skal ikkje sjå bort i frå at vi kjem med noko ganske raskt, sa administrerande direktør Geir Johan Bakke i Havyard Group like før avtalen vart offentleggjort.

I november 2017 blei dei to selskapa formelt til eitt.

Påfyll i kassa

Børsmeldinga seier ikkje noko om prisen Credo og First Process Holding skal betale for MMC First Process (MMCFP), men i følgje børsmeldinga vil salet styrke Havyard Group og gir pengar i kassa:
"Transaksjonen er basert på en verdsettelse av MMCFP som, ved gjennomførelse, er forventet å bidra til en betydelig effekt på Selskapets bokførte egenkapital, og bidra med en substansiell likviditetseffekt. Selskapet og Kjøper vil oppdatere markedet vedrørende betingelsene og effektene av Transaksjonen ved signering av aksjekjøpsavtalen, som er forventet å være signert senest den 15. Juni."
Fearley Securities er rådgjevar for Havyard Group i samband med handelen og skal og hjelpe Havyard Grouo med å få på plass ein: "langsiktig bærekraftig kapitalstruktur" heiter det i børsmeldinga.
Som ein del av handelen kjøper Havyard Group MMC First Process sin aksjepost på 77 prosent i MMC Green Technology AS. MMC Green Technology lagar mellom anna handteringssystem for ballastvatn.