Grand Canyon III kan verte utsett

Skipet ligg no til utrustning ved Kleven-verftet Myklebust i Gursken.
- Dette har eg absolutt ingen kommentar til, seier Kleven-direktør Ståle Rasmussen.
NETT NO kjenner til at det er på tale å utsetje ferdiggjering av skipet.

Har langtidsavtale

Grand Canyon III er eit 126,7 meter langt offshore konstruksjonsskip til Ålesund-baserte Volstad Management. Skipet er eitt av tre søsterskip som skal har langtidsavtale med det amerikanske selskapet Canyon Offshore.
Heller ikkje Volstad Management har nokon kommentar til saka.
Etter det NETT NO kjenner til, er tilsette på Myklebust Verft orienterte om at det kan verte utsetjing av levering av Grand Canyon III, men dette vert ikkje offentleg før det amerikanske selskapet sender børsmelding.

Neppe bygd i dag

Då søsterskipet Grand Canyon II vart overlevert til Volstad Management i mars, uttalte direktør Finn Syversen på at han tvilte på om skipa hadde vorte bestilte i dag.
- Vi har femårsavtale med Canyon Offshore, pluss opsjonar, så for oss ser det bra ut. Men det er nok tvilsamt om Canyon Offshore hadde satsa på tre slike båtar i dag om dei visste korleis marknaden kom til å utvikle seg, sa Syversen.

For Myklebust Verft vil ei utsetjing truleg ikkje få større konsekvensar.