Gode tider for småkraftselskap

- Ja, for fire av anlegga har vi fått godkjenning for å verte ein del av ordninga med elsertifikat. Dette betyr ein snittpris på 14,5 øre ekstra per kWh i ein tiårsperiode.
Det seier dagleg leiar Trond Ryslett for dei fem småkraftverka som ligg under .
Dei fire kraftverka som vert med i elsertifikatordninga har ein årsproduksjon på rundt 50 GWh, slik at årleg ekstra inntening kjem opp i rundt 7,5 millionar kroner.
- Dette er gode pengar, som kan brukast både til oppgradering, vedlikehald og til ekstra utbyte, seier Ryslett.

Solide utbyte

Han har det daglege ansvaret for kraftverka Heidelva, Sundal og Kviven i Austefjorden i Volda kommune, samt Skjåstad og Vågen kraftverk på Bjørke i Ørsta kommune.
Etter den spede starten i 1998, har det vore gode resultat siste åra.
- Vi har betalt ut rundt 40 millionar kroner i utbyte dei siste åtte åra, seier Ryslett.

Gardbrukarar og 'vanlege folk'

Det er totalt 30 eigarar på dei fem kraftverka. Ryslett seier at utbyta kjem godt med.
- Dette er gardbrukarar og 'vanlege folk'. Utbytet ser ein mellom anna att på korleis gardane vert vedlikehaldne.
- I grisgrendte strok er slike inntekter ekstra kjærkomne.
Høgaste inntekter i 2015 hadde Vågen kraftverk med 3,5 millionar kroner og eit resultat før skatt på 887.000 kroner.
Best resultat før skatt hadde derimot Sundal kraftverk med ein million kroner av ei omsetning på tre millionar.
Skjåstad kraftverk selde kraft for 1,7 millionar og hadde eit resultat før skatt på 692.000 kroner, Kviven kraftverk hadde inntekter på 1,2 millionar og eit resultat før skatt på 389.000 kroner, medan resultatet før skatt for Heidelva kraftverk vart 126.000 kroner av ei inntening på vel 0,4 millionar.

Satsar på spot

Trond Ryslett karakteriserer resultata som fantastisk bra i ei tid med lave kraftprisar.
- I fjor var gjennomsnittleg kraftpris nede på 18,5 øre/kWh. Likevel klarde vi oss godt.
Krafta vart seld på spot gjennom Nordpol.
- Vi tek ei vurdering om vinteren på kva vi skal satse på, men siste åra har det vore rett å satse på spot, seier Ryslett.

Gode prisar

Han opplyser at halvparten av inntektene stammar frå snøsmeltingsperioden mai, juni og juli.
- Det er desse tre månadene som avgjer heile året.
Han seier at 2016 også teiknar til å verte eit godt år.
- Vi fekk gode prisar i snøsmeltingsperioden.

Skeptisk til hydrogen

Småkraftentusiasten frå Austefjorden vil ikkje over til produksjon av hydrogen.
- Nei, eg ser ikkje for meg at eg skal sitje i eit skur i Austefjorden og produsere hydrogen av vasskrafta.
- Vi held fram med produksjon av elektrisk kraft, sjølv om vi har utfordringar knytt til nett-tilgangen.