Gode tal frå Kleven-eigaren

Kroatiske DIV Grupa med Tomislav Debeljak i spissen er i ferd med å overta Kleven Verft etter at det i lengre tid har pågått forhandlingar mellom Kleven-leiinga og repersentantar for det kroatiske familieeigde selskapet.
Sidan 2013 har DIV Grupa vore eigar av Brodosplit, det største skipsverftet i Kroatia, og målet er no at Brodosplit og Kleven Verft saman skal verte ei så slagkraftig eining at ein kan verte ein leiande internasjonal aktør på bygging av mellomstore, komplekse skip.
Dette er godt nytt for Kleven, men for verftet er det viktigast å ha ein eigar med ein god kapitalbase til å finansiere nye prosjekt.

Les også:

Bra resultat

NETT NO har fått tilgang til 2018-reknskapet til DIV Grupa.
Der går det fram at konsernet samla sett i 2018 omsette for knappe 1,7 milliardar kroner, opp frå vel 1,5 milliardar året før.
Driftsresultatet enda på 125 millionar kroner, mot 179 millionar i 2017.
Resultatet før skatt vart på 107 millionar kroner, ned frå 148 millionar.
Ved utgangen av 2018 var eigenkapitalen på vel 2,5 milliardar kroner, medan samla gjeld var på vel 2,1 milliardar kroner, der 1,1 milliardar var langsiktig.
Innan skipsbygging var omsetninga i 2018 på vel 700 millionar kroner, mot 540 millionar kroner året før.

Ferdig restrukturering

I årsmeldinga vert det vist til at for skipsbygging var 2018 spesielt viktig sidan dette var siste året i ein femårig restruktureringsplan for verftet Brodosplit, som DIV Grupa overtok frå staten i 2013.
DIV Grupa viser til at konsernet har oppfylt alle vilkåra som låg til grunn for overtakinga av verftet i Split.
Her disponerer Brodosplit eit samla areal på 785.000 kvadratmeter, der 563.000 kvadatmeter er på land.
Leigeavtalen er på 32 år.

Solid ordrebok

For Kleven er det viktigaste uansett planane for framtida, og i årsmeldinga gjer DIV Grupa det klart at det skal satsast stort på skipsbygging framover.
Ved utgangen av året hadde konsernet ei samla ordrebok på rundt fire milliardar kroner, der ein betydeleg del kom frå skipsbygging.
Blant anna fekk Brodosplit på tampen av året fleire kontraktar med det italienske selskapet Fincantieri på bygging av store seksjonar til cruiseskip.

Ser store synergiar

I tillegg hadde ein gjort avtale om bygging av verdas største seglskip, i tillegg til eit polart ekspedisjonscruiseskip til Quark Expeditions.
Spesielt ser konsernet for seg at ein skal satse på mellomstore skip på mellom 100 og 200 meter lengde. Dette kan vere ekspedisjonscruiseskip, større yachtar og ferger, i tillegg til militærskip.
I årsmeldinga vert det også slått fast at hovudprioritet er å styrke lønsemda innan skipsbygging, og ved overtakinga av Kleven Verft slo konsernsjef og hovudeigar Tomislav Debeljak fast at saman med Kleven skal ein skape synergiar som gjer at byggjekostnadene vert reduserte med opptil fem prosent, noko som også kraftig vil styrke konkurransekrafta for dei to verfta.

Meir om saka:

2018-resultatet:

Bakgrunn: