God start på året

- Dette vil ordne seg. Det ser slett ikkje verst ut framover, og vi er sikker på å finne kjøparar til dei to skroga, seier dagleg leiar Asmund Torvik.
Sidan 2010 har Herøy-bedrifta satsa på arbeidsbåtar, i hovudsak til oppdrett.

Nye kontraktar

I fjor vart det levert fem båtar, og den sjette var godt i gang. I år har ein alt fått kontrakt på to nye.
- Året har starta godt. Vi er innarbeidde i marknaden, og vi reknar på mange nye tilbod.
I produksjonshallen i Torvik er ein arbeidsbåt til Nordfjord Forsøksstasjon i Davik snart ferdig til å leverast. Deretter skal det leverast to båtar til Sjøtroll Havbruk i Bekkjarvik.

Utanlandsk interesse

Hittil har dei fleste kontraktane gått til norske kundar.
- Men i den seinare tid, har vi blitt kontakta av kundar frå til dømes Island, Sverige, Finland og Russland, seier Torvik.
Båtane er gjerne på 12 x 5 meter, og har eit trimaranskrog.
- Dette er arbeidsbåtar, som tek med seg mykje last og er stabile i sjøen.

Planlegg hurtiggåande båt

Dei største båtane er bortimot 15 meter lange.
- Vi har fleire modellar, men i dagens lokale kan vi ikkje ha lenger båtar enn 15 meter, seier Torvik.
Han opplyser at arbeidet er i gang med å utvikle ein hurtiggåande båt.
- Ja, dette vert ein modell som skal kunne gå i 25 knops fart.

Vil utvide

Ti mann arbeider ved bedrifta i Torvika, der utrustninga av båtane skjer. Skrogmodulane vert bygde andre stader.
No ønskjer Torvik å utvide.
- Ja, vi er i gang med å søkje kommunen om dispensasjon til å setje opp ein ny utrustningshall på 200 kvadratmeter.
- Vi er avhengige av dispensasjon ettersom området der vårt bygg ligg, er avsett til eit framtidig turistprosjekt, som så langt ikkje har vorte noko av.