God butikk på skipsmekling

Tomannsbedrifta Atlantic Marine har hatt ein driftsmargin på over 40 prosent kvart år sidan starten. Kåre Nyvoll og Stig Vang, som både eig gjennom sine heileigde investeringsselskap og driv selskapet, har kunne ta ut tilsaman 44,5 millionar kroner i utbytte sidan Atlantic Marine blei etablert.
Det var også Nyvoll som tok telefonen til Tore Roaldsnes i Roaldsnes sitt fiskerbåtreiarlag Bluewild og spurte om han var interessert i å overta trålaren Volstad med tilhøyrande kvotar, etter at Eivind Volstad hadde bestemt seg for å selje. Det stadfesta Roaldsnes, etter at Bluewild og Eivind Volstad sitt selskap Volstad as offentleggjorde handelen denne veka.

Ingen av partane vil gå ut med prisen på båt og kvotar, men etter det NETT NO kjenner til er kvotane åleine verdsett til minst ein halv milliard kroner. Nergård-konsernet har ein båt i omlag same storleik under bygging hos Vard, til over 500 millionar.

10 år

Atlantic Marine blei etablert sommaren 2010 med formål å drive med "Skipsmegling, kjøp og salg av fiskefartøy samt deltakelse i andreselskaper med lignende formål".
Nett no har selskapet 11 fartøy liggande ute for sal på nettsida si, fleirtalet av dei fiskefartøy. I tillegg er selskapet meklar ved kjøp og sal av fiskekvotar.
Driftsinntektene har variert, med dei to siste åra som topp (17,4 millionar i 2018) og botn (7,8 millionar kroner i 2019). Gjennomsnitt sidan starten er i underkant av 12 millionar kroner. (Sjå resultat-tabell til høgre på sida, nederst på sida på mobil).

Små aktørar

Til skilnad frå skipsmeklarar som driv med store handelsskip er fiskebåtmeklarbransjen prega av små aktørar.
I Ålesund har Nyvoll og Vang konkurrentar i Remøy Skipsmegling, med Torstein Kringstad og Endre Remøy som meklarar.
Danske Ture Korsagers selskap Atlantic Shipping i København er ein av dei større og opererer verda over, men heller ikkje det selskapet har meir enn ti meklarar - og dei meklar også handelsskip i tillegg.