Gaar av som konsernsjef
HAREID: Etter ni år i sjefsstolen, sluttar Ronald Dyrhol som toppsjef i Hareid Elektriske, her har Dyrhol statsminister Erna Solberg på bedriftsbesøk.
Nytt

Går av som konsernsjef

Øyvind Halkjelsvik er konstituert som konsernsjef i Hareid Elektriske.

14.11.2018
Konsernsjef Ronald Dyrhol har gjeve styret i Hareid Elektriske AS beskjed om at han ønskjer seg over i ei anna rolle i konsernet.
- Etter ni år i sjefsstolen, er det no på tide å sleppe til nye krefter, seier Dyrhol, i ei pressemelding onsdag.
- Sidan eg starta i selskapet for 31 år sidan, har vi gått gjennom ei fantastisk utvikling. Vi er no om lag 690 tilsette og omset for over ein milliard kroner i året.
- Ein slik vekst krev omstilling og kontinuerleg utvikling, og eg føler no behov for å ta eit steg til sides og bidra i ei anna rolle i konsernet.

- Viktig del av suksessen

Styreleiar Bjørn Bjåstad seier i pressemeldinga at styret respekterer avgjerda.
- Ronald har vore ein viktig del av den suksessen vi har hatt i Hareid Group, og er svært glade for at han blir med oss vidare og framleis ønskjer å bidra med si kompetanse og lange erfaring.
- Vi er takksame for den innsatsen han har lagt ned for selskapet gjennom mange år, og ser fram til det vidare samarbeidet.

Halkjelsvik konstituert

Styret i Hareid Elektriske AS har konstituert Øyvind Halkjelsvik som konsernsjef. Halkjelsvik kom i oktober til Hareid Group som direktør for HR og organisasjonsutvikling, etter å ha arbeidd i Rolls-Royce Marine sidan 2002.
Hareid Group består av fjorten heil- og deleigde selskap, og leverer varer og tenester knytt til elektroinstallasjon på land og for skip i tillegg til forbrukarelektronikk.
Konsernet har om lag 690 tilsette i tre land, og har hovudkontor på Hareid.

Publisert: 14.11.2018 13:54

Sist oppdatert: 10.02.2021 14:28