Forskarar fann plast i Norskehavet

NPK: Forskarar ved Noregs geologiske undersøking (NGU) har funne mikroplast i to prøver av botnsediment i Norskehavet og ved Fjørtoft i Møre og Romsdal.
NGU har no sendt ytterlegare åtte prøver frå Norskehavet, Lofoten og Finnmarkskysten til laboratorieundersøkingar i Gent i Belgia. Plastanalysane skal gi svar på om kartleggingsprogrammet Mareano bør innføre mikroplastanalysar som fast prosedyre framover.

Plast overalt

– Plast finst overalt. Det er urovekkjande, men dessverre inga overrasking at sjøbotnen òg er forureina av mikroplast, seier forskar Henning Jensen ved NGU.
I botnprøvene tatt på nesten 1.000 meters djup i kontinentalskråninga ved Storneset i Norskehavet og på 100 meters djup ved Fjørtoft, fann forskarane sjokkerande mange ørsmå mikroplastbitar.

Mikroplast på middagsbordet

– I prøvene var det mellom 40 og 50 partiklar per kilo sediment. Cirka halvparten av partiklane er under 0,1 millimeter, seier Henning Jensen.
– Problemet er at fisk og sjødyr et plasten. Vi finn han igjen i magesekken, men òg i vev, blautdelar og kjøtt. Dermed hamnar mikroplasten på middagsborda våre òg, seier han.
Gjennom Mareano-programmet kartlegg forskarar frå Havforskingsinstituttet, NGU og Kartverket djupne, botnforhold, biologisk mangfald, naturtypar og botnforureining i norske kyst- og havområde. Prosjektet blir administrert av Miljødirektoratet i samråd med fem departement.