Fleire ser på denne båten

- Nei, vi har ingen hast, men får vi eit godt nok tilbod, så vert det nok sal.
Det seier administrerande direktør Karsten Sævik i Fosnavåg-baserte Remøy Shipping.
Den 17 år gamle Søviknes-bygde båten ligg i opplag i Fosnavåg etter at kontrakten med WesternGeco vart avslutta før jul.
Fram til då hadde båten kontinuerleg vore i arbeid for verdas største seimikkselskap, eit selskap som eigaren Schlumberger har varsla skal trappe ned aktiviteten.

Humanitær interesse

Båten har mellom anna hatt oppdrag i Nordsjøen, Mexicogulfen, i Den persiske bukt og utanfor Mosambique.
- I hovudsak har båten fungert som støttefartøy, men han har også fungert som slepefartøy for seismikk-kablar, seier Sævik.
Han opplyser at fleire aktørar har tatt kontakt og vist interesse for båten.
- Ja, vi har endåtil vorte kontakta av humanitære organisasjonar som vurderte om båten var eigna som redningsfartøy i krisesituasjonar.

Nedbetalt

Inntil vidare sit reiarlaget roleg.
- Vårt hovudmål er å få båten i arbeid igjen, og vi har god tru på at vi skal lukkast med det til våren.
Sævik seier at båten for lengst er nedbetalt.
- Ja, vi har no litt utgifter til kaileige og straum, og kan leve med det ein periode.

Polsk mannskap

Båten har sidan starten hatt innleigd polsk mannskap.
Sævik seier at ein held kontakten med dei polske sjøfolka.
- Ja, dei har gjort ein god jobb for oss i lang tid. Sjølv om dei er innleigde frå eit anna selskap, ser vi på dei som ein del av våre eigne. Vi satsar difor i utgangspunktet å ha med oss desse sjøfolka vidare om vi no får nytt arbeid for båten.
Geco Scorpio er 55,8 meter lang, 13 meter brei og er innreidd for eit mannskap på 14.