Fiskerstrand: Lysning til hausten

- Det ser i alle fall langt lysare ut enn det gjorde ved årsskiftet, seier konsernsjef Rolf Fiskerstrand.
Sula-verftet driv både med nybygging og reperasjons, ombyggings- og vedlikehaldsarbeid. Det siste kollapsa ved årsskiftet.
- I fjor hadde vi 350.000 timar til reperasjons- og vedlikehaldsoppdrag, men ved årsskiftet sa det brått stopp.
- Eg har nesten ikkje sett maken til kollaps.

Betring til hausten

For første gong på mange år har verftet også måtte ty til permitteringar. Men frå hausten byrjar ordrebøkene å fyllast opp på nytt.
- Ja, vi har fått oppdrag både på fiskebåtar, ferjer og andre båtar.
- Men det er også slik at vi tek alt vi kan, slik situasjonen er.

Brønnbåtar

NETT NO kjenner til at det nærmar seg offentleggjering av fleire nybyggingskontrakter for bygging av brønnbåtar til norske selskap, mellom anna som følgje av nye fraktavtalar for Marine Harvest.
Fiskerstrand Verft er eitt av verfta som eit høgaktuelt til å få brønnbåtkontrakt, der skroga for Fiskerstrand sin del skal byggast i utlandet, og der brønnbåtane skal utrustast ved verftet i Sula.
- Dette er noko eg ikkje kan kommentere, men vi jobbar med spennande nybyggingsoppdrag både for ferjer, brønnbåtar og fiskebåtar.
Fiskerstrand seier at konkurransen er knalltøff.
- Det er alle mot alle. Alle er på jakt etter nye kontraktar og prisane vert pressa.

Gassferjer

Ved verftet startar no arbeidet på utrustning av den første av to gassferjer til Boreal Transport Nord.
- Den første skal leverast i september, den andre i november, seier Fiskerstrand.
Skroget til ferjene er bygde ved Ada skipsverft utanfor Istanbul.
Ferjene er 62,6 meter lange og skal setjast inn på samband i Finnmark.
Det er Finnmnark fylkeskommune som er oppdragsgivar, medan Boreal Transport Nord er operatør.