Grieg Seafood har leigd "Far Server" ut august for å drive avlusing av oppdrettsanlegga sine på Shetland. Kjøper også avlusingsanlegg frå OptimarStette-bedrifta Seaside på Stranda.
Det stadfestar Knut Utheim hos det bergenske oppdrettselskapet. I sommar er det snakk å leige både båt og avlusingsanlegg, men selskapet har og kjøpt sitt eige avlusingsanlegg, som Seaside skal levere i september.

Testa anlegg

Forsyningskipet er tidlegare i år brukt til avlusing av fisken i Fjordlaks sine anlegg i Storfjorden.
- Dette er eit bevis på det vi går rundt og snakkar om elles, handlekrafta i det maritime clusteret på Møre, sa konsernsjef Karl-Johan Bakken i Farstad Shipping då NETT NO i slutten av april skreiv om samarbeidet mellom reiarlaget og Fjordlaks.

Det er Seaside på Stranda som har har utvikla avlusingsanlegget som er blitt testa ombord i "Far Server".
Anlegget som Grieg Seafood har kjøpt er ei vidareutvikling av prototypen som står ombord i "Far Server".

Lunka vatn

Seaside-anlegget syg oppdrettsfisken opp frå merdene, inn i anlegget og badar den ei kort periode i lunka vatn, før den blir pumpa ut igjen i ei ny merd. Lunka vatn tek livet av lakselusa, ein liten krepseart som snyltar på fisken og i verst fall gir dødlege sår. Oppdrettsnæringa sjølv anslår at den brukar fem milliardar kroner i året på å bekjempe lakselus, som i aukande grad er blitt motstandsdyktig mot kjemikalia som hittil har dominerte behandlinga mot lakselus.

Utheim seier Grieg Seafood tinga sitt eige anlegg basert på erfaringane som er gjort med anlegget ombord i "Far Server".

Eigen båt

Avlusingsanlegget som Grieg Shipping kjøper skal settast ombord i brønnbåten "Gerda Sæle", som er eig av eit brønnbåtreiarlag i Austevoll med same namn.
Målet er å montere anlegget slik at det kan takast lett av og på, slik at "Gerda Sæle" også kan gå som vanleg brønnbåt.
Utheim seier oppdrettselskapet vil ha ein brønnbåt fordi "Far Server" er i største laget til operasjonar på Shetland, der oppdrettsanlegga er mindre enn i Noreg.

To-sifra millionbeløp

Dagleg leiar Frode Kjølås i Seaside sa til NETT NO i mai at han var optimist med omsyn til sal av avlusingsanlegget, som har kosta eit "to-sifra millionbeløp" å utvikle.
Så langt har avlusingsanlegget slått an. Kjølås seier det er snakk om 8-10 signerte kontrakter og fleire intensjonsavtalar.