- Utan Elton John hadde det vore eit lite minus i fjor, seier Ante Giskeødegård i Momentium.
Festival- og konsertarrangøren Momentium står bak festivalane Ålesund Live, Sommarfesten på Giske og Jugendfest - og er i tillegg arrangør av store konsertar som den Elton John held på Color Line Stadion i fjor sommar. Det er også selskapet bak Bryan Adams sine to konsertar i Ålesund i vinter og Sting-konserten i juni.
Momentium er eigd av søskenbarna Ante Giskeødegård og Lars Berg Giskeødegård, gjennom selskapet Ante og Lars Holding.

Bør tene meir

Momentium fekk eit overskot før skatt på 0,8 millionar (sjå tabell). Det utgjer 1,6 prosent av driftsinntektene.
Giskeødegård meiner overskotet bør utgjere 5-8 prosent av driftsinntektene.
-Vi er alltid fornøgde når vi går i pluss, men vi ser samtidig at det er litt små marginar.
Tala i tabellen er ikkje direkte samanliknbare. I 2015 var festival- og konsertverksemda fordelt på to selskap, Momentium og Momentium Live, som samla sett gjekk med litt over ein million i overskot. I 2016 var alt samla i Momentium, og Momentium Live oppløyst.

Tyngre ansvar

Storleiken Momentium etterkvart har oppnådd gjer at Giskeødegård legg større vekt på at verksemda må få opp lønsemda. Det er rett og slett blitt mange som har Momentium som arbeidsplass, og som risikerer å stå utan jobb om selskapet ikkje klarer seg.
Det ansvaret er blitt tyngre å kjenne på etterkvart, og er ein viktig grunn til å priorere overskot.
2016 var dessutan eit godt år, med brukbart vêr på alle arrangementa. Det betyr mykje for ein arrangør av utandørskonsertar på Nordvestlandet. Slike år bør gi betre resultat for å ha noko å stå i mot med om vêret skulle vise seg frå ei dårlegare side, slike Giskeødegård ser det.

Vurderer endringar

Tradisjonelt har Jugendfest gitt overskot, medan Ålesund Live og Sommarfesten på Giske er festivalane som har gått i minus. Spesielt Sommarfesten på Giske, som i utgangspunktet er gratis for tilhøyrarane, kostar. Deltakarane kan spleise på festen, og gjennomsnittleg bidrag er rundt 100 kroner, som er langt under det ein festivalbillett kostar.
Giskeødegård anslår at den kostar 1,5 til to millionar kroner for Momentium. Sjølv om Sommarfesten er hjartebarnet til både han og Lars Berg Giskeødegård seier Ante Giskeødegård at dette er mykje pengar å bruke, i lys at at det kan han innverknad også på resten av verksemda.
Til hausten skal drifta av alle tre festivalane under lupa.
- Sommarfesten og Ålesund Live kan det blir endringar på, seier Giskeødegård.
Både redusert omfang av festivalane, innføring av inngangsbillettar på Sommarfesten, og å ikkje arrangere festivalene er alternativ som kjem til å bli vurdert.
Terminalen Byscene, som også er eigd av Ante og Lars Holding hadde sitt første heile driftsår i 2016. Selskapet har gått med overskot sidan starten i 2015 (sjå tabell).

Satsar på konferansar

To av nyskapingane eigd av Ante og Lars Holding har førebels ikkje så informative reknskap å legge fram.
Mikrobryggeriet Molo Brew har nettopp opna dørene.

Konferansearrangøren Momentium Event blei etablert i mai i fjor.
Erfaringane etter å ha arrangert fiskerikonferansen Next Wave i vår gjer at Momenitum Event vil arrangere den på nytt neste år.
Etterkvart et målet å utvide til tre - fire konferansar i året - med Øygardshallen på Giske som arrangørstad .

Kva dei øvrige konferansane skal handle om er førebels ikkje offentlegjort. Giskeødegård seier det er sannsynleg at den første - i tillegg til fiskerikonferansen - blir arrangert neste år.