- Det går overraskande bra

- Vi har mist dei fleste badegjestane frå Ulstein og Hareid, men vi har fått nye frå andre stader.
Det seier dagleg leiar Karl Petter Sortehaug ved Sunnmørsbadet i Fosnavåg.
Svikten ser ut til å verte på rundt 10 prosent.
- I fjor hadde vi rundt 100.000 badegjestar. I år ser vi ut til å nå 90.000. Det er vi fornøgd med. Det går eigentleg overraskande bra, seier Sortehaug.

Vågå og Lom

Flest badegjestar er frå Ålesund og nærområdet, men nye har kome til i år.
- Vi har no mange som kjem frå Våga, Kvam, Lom og Bismo.
- Dette er eit resultat av bevisst marknadsføring, mellom anna i lokalavisa Fjuken.

Mange barnefamiliar

Sortehaug seier at ein spesielt har lukkast med tilbod til barn og barnefamiliar.
- Ja, dette satsar vi stort på, og tilreisande kombinerer gjerne ein tur på Sunnmørsbadet med andre opplevingstilbod.
Totalt er det rundt 30 som arbeider ved Sunnmørsbadet, men få i heil stilling.
- Mellom anna har vi mange studentar, som kombinerer kvelds- og helgejobb her med skulegang.
- Vi har fleire frå Høgskulen i Volda.

Gasellekandidat

Nyleg vart Sunnmørsbadet også nominert til Gaselleprisen i regi av Dagens Næringsliv, ein pris som går til dei store vekstbedriftene.
- Dette er sjølvsagt hyggjeleg, seier Sortehaug.
- Då vi starta opp, var det mange som var kritiske og spådde denne satsinga nord og ned.
- Men i motsetning til andre store badeland, som har fått svikt og økonomiske problem etter det første året, har vi gått andre vegen.