Bourbon slankar staben

- Slik det ser ut vil nedbemanninga berøre seks faste stillingar, seier adm. dir. Bjørn Idar Remøy.
I administrasjonen i offshoreselskapet er det i dag rundt 40 tilsette.
- Vi slankar staben i takt med at vi har færre sjøfolk og lavare aktivitet offshore, seier Remøy.

To skip i opplag

Reiarlaget har alt lagt konstruksjonsskipet «Bourbon Pearl» i opplag og vil også legge opp forsyningsskipet "Bourbon Clear".
- Vi har ikkje konkrete planar om å leggje fleire skip i opplag, men vi kan heller ikkje avvise det, seier Remøy.

Oppseiingar

Han opplyser at nedbemanninga i administrasjonen ikkje kan gjennomførast utan oppseiingar.
- Nei, slik det ser ut til no, vert det også oppseiingar.
- Vi likar det ikkje, men slik er dessverre realitetane.

Ferdig til sommaren

Nedbemanningsprosessen skal vere gjennomført før sommaren.
- Vi køyrer no ein prosess rundt dette.
Bourbon Offshore Norway har vore heileigd av franske Bourbon Offshore sidan 2003. Remøy avviser at dette er første steg på ei vidare nedtrapping av aktiviteten i Norge.
- Nei, Bourbon Offshore skal framleis vere i Norge, men vi er nøydde til å kutte der vi kan i dagens situasjon.

Krav frå styret

Han opplyser at nedbemanninga er ein konsekvens av krav frå styret.
- Ja, styret set rammer, og vi må prøve å halde oss innanfor desse rammene. Av og til betyr dette dessverre også at vi må kutte.
Bourbon Offshore Norway har 22 skip og rundt 500 tilsette.
Morselskapet Bourbon Offshore har på sin side meir enn 500 skip og operasjonar i meir enn 50 land.