Andre kvartal gjekk i minus, resultatet i tredje kvartal blir svakt og Engeset lova ikkje snarleg stor auke i overskotet framover heller då han presenterte reknskapen for andre halvår for investorar og analytikarar i Oslo i dag tidleg.

- Frå nokre av kommentarane (om selskapet, red. merk) så ser vi at nokre investorar og kanskje også analytikarar ser på Hexagon som ein "value stock" (ein aksje i eit selskap som raskt kan auke lønsemda, red merk.). Det er litt overraskande for oss. Eg vil gjere det klart at sjølv om vi likar å tene pengar og har ein historikk som viser at vi er i stand til det må vi no også balansere omsynet til forteneste på kort sikt med omsynet til å sikre oss ein posisjon på lang sikt, sa Engeset under presentasjonen i dag tidleg.

Opp og ned

Då handelen på Oslo Børs stengte i ettermiddag var aksjekursen i Hexagon Composites ned 15,27 prosent samanlikna med tysdag ettermiddag, til 28,30 kroner pr. aksje Den kursen verdsett selskapet til 5,1 milliardar kroner.
Ved starten av 2019 var aksjekursen i Hexagon Composites under 25 kroner. Deretter gjekk det oppover til toppen 27.mai. Då var kursen 43,90 kroner pr aksje, som verdsette heile selskapet til åtte milliardar kroner. Etter det er nesten tre milliardar kroner i børsverdi borte.
Flakkfamilien i Ålesund, med Knut Flakk i spissen, eig knappe 18 prosent av aksjane og er nest største aksjonær, etter japanske Mitsui & Co ltd med 25,01 prosent.

Over 100 millionar

Det som må til for å sikre seg den posisjonen Hexagon Composites ønskjer seg på lenger sikt er i følgje Engeset auka innsats på forsking og utvikling, bygge ut organisasjonen for å vinne innpass mellom anna i Asia og utvikle produksjon og rutinar for å handtere ein storskala produksjon av produkt Hexagon Composites i dag produserer i liten skala. Med unntak av Hexagon Ragasco som lagar dei berbare gassbehaldarane nordmenn kjenner frå gassgrillar, er ikkje den øvrige delen av produksjonen tilpassa produksjon i stor skala.
Hexagon Composites lagar tankar og system i mange storleikar for naturgass, biogass og hydrogen, til bruk i transportmiddel og som energiforsyning på gruve og industrianlegg. Det er spesielt hydrogensatsinga som krev store investeringar, men og den øvrige delen av verksemda er omfatta av selskapet sitt investeringprogram.
Engeset anslår at selskapet i år brukar over 100 millionar på programmet og kjem til å investere enda meir dei komande åra. Programmet vilvar tilminst 2021, seier han.

Tydlege

- Vi tenkjer at vi i alle fall må rekne to-tre år får vi byrjar på få pay-back på denne satsinga, seier Engeset til NETT NO.
Han meiner bodskapen i dag er noko selskapet har kome med også tidlegare.
- Vi synest vi har vore tydlege, seier Engeset.