Aukar omsetninga og feirar 60 år

- Vi har fantastiske tilsette som har hovudæra for den utviklinga vi har hatt.
- Vi er svært heldige som har ein så dyktig og omstillingsvillig organisasjon, seier adm. dir Rune Sætren ved Nordvestvinduet på Almenning i Vågsøy.

Fire lærlingar

Selskapet har 91 tilsette, der svært mange kjem frå nærområdet.
Også i fjor vart arbeidsstokken utvida.
- Vi har no også tatt inn fire lærlingar. To er lærlingar i industrisnekkarfaget og to er lærlingar i CNC-operatørfaget.
- Vi er alltid på jakt etter fleire dyktige medarbeidarar, seier Sætren.

Tapte på Brexit

Nordvestvinduet produserer og sel vindu, vindusdører og ytterdører, og all produksjon skjer i lokala på Almenning.
I tillegg har selskapet avdelingskontor i Molde og eit salskontor i Skotland.
Sætren seier at konkurransen er hard, og Brexit slo heller ikkje heldig ut.
- Vi merka kursfallet på britiske pund frå rundt 13,50 til rundt 9,50 målt mot norske kroner, men situasjonen har no normalisert seg.
- Samla sett er vi fornøgde med resultata av satsinga i Storbritannia.
Nordvestvinduet omsette i 2016 for 105,4 millionar kroner, og resultatet før skatt vart på 1,9 millionar kroner. Det er 1,3 millionar lavare enn i 2015.
- Vi er ikkje fornøgde med resultatet, men vi presterte over budsjett og har gjennomført langsiktige grep for å sikre framtidig lønsemd, seier Sætren.

Nye investeringar

Han seier at hittil i år har det vore omsetninsgvekst, og ein ligg på linje med budsjettmåla.
- I tillegg har vi ei offensiv satsing på forbetringsarbeid, mellom anna gjennom investering i Lean og nye maskiner.
- Vår siste maskininvestering er på over fire millionar kroner, og skal installerast i fellesferien.
Rune Sætren eig sjølv 8,6 prosent i selskapet.
Største aksjonærar er Dag Almenning med 45,8 prosent og Jonfinn Almenning med 14,9 prosent.
Selskapet har totalt ti aksjonærar, som no kan fordele eit utbyte på 500.00 kroner for fjoråret.