Sykkylven Stål driv produktutvikling, rør- og platebearbeiding, maskineringer og overflatebehandling og har kundar innan møbel, maritim industri, bygg og anlegg samt ferdigvarer til skulemøblar og -innreiing.
Tradisjonelt var det møbel som var hovudmarknaden til Sykkylven Stål, men etter finanskrisa og nedturen i møbel, har selskapet måtte omstille seg. No er maritim bransje blitt viktig for selskapet, i tillegg er eksporten av møbel på veg opp igjen som følgje av lav kronekurs.
Les også:
- Vi har investert tungt i teknologi for å bli leverandør til mellom anna Rolls-Royce Marine og Vard. No har vi også tenkt å møte ein veksande marknad i havrommet, der vi no leverer til Optimar mellom anna, seier adm. direktør Karl Inge Rekdal.

Ambisjonar om vekst framover

Dei har ein teknologi som gjer det muleg å levere til fleire bransjar og dei har ambisjonar om vekst framover. Ekornes, Jets og leveranser til Jensen-sengene står også på kundelista, for å nevne nokre.
- Vi har eit breitt grunnlag i marknaden, det er spennande. Men ting skjer så raskt, verden er blitt mindre og bransjar er påverka av oljepris og kronekurs, derfor må ein omstille seg raskare enn før.
Dei jobbar aktivt med topplinja og også å styrke konkurransekrafta gjennom teknologi og innovasjonar.

Patentert ny løysing for regulering av sitjemøblar

Sykkylven Stål har mellom anna utvikla eit nytt beslag for regulering av sitjemøblar med støtte frå Innovasjon Norge. Løysinga er innovativ og gir ein bevegelse av stolar/sofaer som er unik og som gir stor komfort.
- Dette vil kunne gi auka marknadsmulegheiter for eksisterende og nye møbelprodukt. Løysinga er patentert i ei rekkje land i Europa, samt USA og India og vi er i kontakt med fleire internasjonale kundar, seier Rekdal.
Dei kan også lett tilpassa den patenterte løysinga til dei ulike møbeldesignarane sine ønskjer og behov, som då får stor friheit. Prosjektet pågår no for fullt i samarbeid med MRB og SINTEF.

Gode signal i marknaden no

I år er ambisjonen for selskapet å omsetje for 50 millionar kroner.
- Vi er opptatt av å vere konkurransedyktige på pris, kvalitet og leveringspresisjon, og vi skal vere innovative. Når det gjeld i inneverande år, starta det litt tungt, men det ser bra ut i andre halvår. Difor vil vi få ein betydeleg auke både på topp- og botnlinje i år og det er veldig gode signal i marknaden.
I fjor var omsetninga 44 millioner og dei fekk eit lite overskot på 300.000 kroner (sjå tabell). Selskapet hadde 35 årsverk i fjor.
Dei største aksjonærane er Karl Inge Rekdal og Lars Magnus Skog gjennom selskapet Sykkylven Stål Holding (50/50). I tillegg eig Rekdal 9,6 prosent og Lars Magnus Skog 2,4 prosent direkte. Raymond Gjerde, Lovise Signe Gjerde eig begge 9 prosent kvar, i tillegg eig Tor Jan Skinnes, Helge Tårnes og Hallgeir Tandstad 2,4 prosent kvar.

Brenn for betre rammevilkår for næringslivet

Rekdal er forøvrig styreleiar i NHO Møre og Romsdal, nestleiar i Norsk Industri sitt hovudstyre og sit også i styringsgruppa i GCE-klynga som representant for SMB-bedrifter.
- Eg brenn for betre rammevilkår for SMB-bedrifter og privat eigarskap her i landet. SMB står for ein veldig stor del av sysselsetjinga i Norge. No må politikarane forstå at næringslivet må ha rammevilkår for å kunne vidareutvikle og omstille seg. Eg håper at dei beste politikarane måtte vinne i haust og at dei deretter gjer det som må til. Vi må ikkje miste privat eigarskap ut av landet, og her er eit fantastisk næringsliv i Møre og Romsdal. Det er på Vestlandet og langs kysten det vert skapt verdiar, seier Rekdal.