NPK-NTB-Gunnhild Hokholt Bjerve og Bibiana Piene
Forslaget, som er utarbeidd av Norsk olje og gass, går ut på at staten dekkjer om lag 90 prosent av alle investeringar på norsk sokkel.
«Oljeselskapene betaler samme beløp i skatt til staten, men på et annet tidspunkt. I stedet for å vente 6 år på å få skattefradraget, får oljeselskapene skattefradrag samme år som investeringene foretas», heiter det i forslaget.
Forslaget er forma ut slik at det motiverer for meir aktivitet, sa Equinor-sjef Eldar Sætre til Politisk kvarter på NRK fredag morgon.
– Det aller viktigaste er å halde oppe aktiviteten og skape grunnlag for ny aktivitet og nye investeringsavgjerder, slo han fast.

– Ikkje varige endringar

Ordninga bør gjelde både noverande og planlagde prosjekt, meiner næringa. Skatteutsetjinga skal omfatte investeringar som blir gjorde i år og neste år, men også investeringar gjort etter dette, dersom investeringsavgjerda er treft før utgangen av 2021 eller 2022.
Informasjonsdirektør Bård Glad Pedersen i Equinor presiserer at det er snakk om ei mellombels ordning.
– Det er ikkje eit spørsmål om skattelette eller å gjere varige endringar. Det er mellombels, og det er ei skatteutsetjing. Heile poenget er at det skal vere mogleg å halde oppe mest mogleg aktivitet for oljeselskap og leveringsindustrien i ein heilt ekstraordinær situasjon, seier han til NTB.

– Industri og fagrørsle saman

Fredag skal det vere eit møte i KonKraft (Konkurransekraft på norsk sokkel), der Norsk olje og gass, Norsk Industri, Norges Rederiforbund og Landsorganisasjonen i Norge (LO) og LO-forbunda Fellesforbundet og Industri Energi er med.
Der vil mellom anna spørsmålet om ei mellombels endring i skattereglane vere tema. Fellesforbundet foreslo førre veke å betre likviditeten i oljeselskapa gjennom å endre skattesystemet mellombels.
I miljørørsla er det likevel skepsis til tiltak som skal halde oljebransjen i live, og på Stortinget har mellom anna SV og MDG teke til orde for at krisetiltaka må bidra til det grøne skiftet.

Har sett krisestab

Koronakrisa og det kraftige oljeprisfallet har sett Equinor i ein svært vanskeleg situasjon, og selskapet har no sett krisestab.
Sjølv om Sætre trur koronakrisa kan bidra til eit raskare grønt skifte og omstillinga til eit lågkarbonsamfunn, meiner han det er viktig å sikre at olje- og gassaktiviteten på norsk sokkel blir halden oppe.
– Verda kjem til å trenge olje og gass i alle tenkjelege scenario framover. Det er viktig at vi driv fram dei investeringane som trengst, seier han.
Sætre fryktar òg at oljeprisen vil falle endå meir framover.
Måndag var oljeprisen heilt nede i 22,58 dollar fatet, det lågaste sidan 2003. Torsdag spratt han opp rundt 30 prosent etter at president Donald Trump antyda moglegheita for ein avtale mellom Saudi-Arabia og Russland, men fredag fall han igjen under 30 dollar fatet.